Tuesday, May 17, 2011

சிறுவர் நாடகம் - தமிழா தமிழா! - KIDS PLAY

தமிழா தமிழா!

சிறுவர் நாடகம்

நாம் ஏன் தமிழ் கற்க வேண்டும்?

உரையாடல்:  (பிரதியாக்கம்: குரு அரவிந்தன்)

(பாடசாலைக்குச் செல்லும் காட்சி) –

பாடசாலை செல்வதற்கேற்ற ஆடை,
புத்தகப்பை அணிந்திருக்க வேண்டும்.

(பாத்திரம் - அண்ணா, தங்கை)

அண்ணா: நிலா வெளிக்கிட்டாச்சே, நேரம் போச்சு கெதியாய் வாங்கோ

தங்கை:  இதோ வர்றேன் அண்ணா..!

அண்ணா: புத்தகம் எல்லாம் எடுத்தீங்களா?

தங்கை:  ஓமண்ணா..!

அண்ணா: சரி வாங்கோ, நாங்க போவோம்.

(இருவரும் பாடசாலை செல்கிறார்கள். வழியில்…)

தங்கை:  அண்ணா நாங்கள் தமிழ் வகுப்புக்கு ஏன் போகிறோம்?

அண்ணா: தமிழ் வகுப்புக்குத் தமிழ் படிக்கத்தான்

தங்கை:  இங்கை ஆங்கிலம்தானே எல்லாரும் கதைக்கினம், பிறகு ஏன் நாங்கள் தமிழ்  படிக்கவேணும்?

அண்ணா: தமிழ் எங்கட தாய் மொழி அதனாலதான் தமிழ் படிக்கவேணும்

தங்கை:  தாய் மொழி எண்டால் என்னண்ணா ?

அண்ணா: தாய் மொழி எண்டால் எங்களுடைய பெற்றோர் அவர்களின் பெற்றோர்  இப்படியே பரம்பரை பரம்பரையாக பேசிவந்த தொன்மையான மொழி

தங்கை:  அதைப்படிக்கிறதால எங்களுக்கு என்ன இலாபம்?

அண்ணா: இலாபம் நட்டம் பார்க்கக்கூடாதம்மா, தாய் மெழி என்று ஏன் பெயர்  வைத்தார்கள் தெரியுமா, தமிழை மறப்பதும் தாயை மறப்பதும் ஒன்றுதான்   என்று நினைவுபடுத்தத்தான் தமிழைத் தாய் மொழி என்றார்கள்.

தங்கை:  புரியலையே அண்ணா ?

அண்ணா: உன்னாலே எப்படி அம்மாவை மறக்க முடியாதோ, அதே போலத்தான்   தமிழையும் மறக்கக்கூடாது.

தங்கை:  நாங்கள் தமிழ் பேசாவிட்டால் என்ன நடக்கும்?

அண்ணா: என்ன நடக்குமா,.? நாங்கள் தமிழன் என்று பெருமையோடு சொல்லிக் கொள்ள    ஒரு இனம் இருக்கமாட்டாது. தமிழ் மொழி அழிந்தால் எங்கள் தமிழ் இனம்   அழிந்துவிடும். மொழி வாழ்ந்தால்தான் எங்கள் இனம் வாழும்.

தங்கை:  தமிழ் இனம் இல்லாவிட்டால் என்ன?

அண்ணா:  நாங்கள் முகவரி அற்றவர்களாகிவிடுவோம். எங்களை யாருமே மதிக்க   மாட்டார்கள்.

தங்கை:   சரி, நாங்கள் தமிழ் கற்பதால் எதிர்காலத்தில் என்ன செய்யமுடியும்?

அண்ணா:  புலம் பெயர்ந்த மண்ணில் தமிழ் மொழியைக் காப்பாற்றமுடியும். பல்கலைக்    கழகம் போவதற்கு தமிழ் மூலம் விசேட சித்தி எடுக்கமுடியும்.

தங்கை:  அது எங்களுக்கு எப்படி உதவுமண்ணா?

அண்ணா: தாய் மொழியைப் படிப்பதால் பல விதத்திலும் பலன் கிடைக்கும்

தங்கை:  வேறு என்ன பலன் கிடைக்கும்?

அண்ணா: எம்மினத்தவருடன் உரையாட, தாத்தா பாட்டியோடு கதைப்பதற்கு,     ஊருக்குப்போனால் உறவினரோடு பேசிப்பழக எவ்வளவு இலகுவாக இருக்கும்.

தங்கை:  வேறு என்னண்ணா?

அண்ணா: தமிழ் மொழியில் உள்ள காவியங்கள், காப்பியங்கள், திருக்குறள்,     தொல்காப்பியர், ஒளவையின் ஆத்திசூடி, கம்பராமாயணம், சிலப்பதிகாரம்,     பாரதிபாடல்கள், தேவாரங்கள், புராணங்கள்,  ஈழத்து இலக்கியம் என்று கணக்கிலடங்காத தாய்   மொழியின் இலக்கியத்தைப் படித்து இரசிக்கலாம்.

தங்கை: தமிழில் அவ்வளவு புத்தகங்கள் இருக்காண்ணா?

அண்ணா: ஓம், எங்களுக்காக எமது முன்னோர்கள் விட்டுச் சென்றிருக்கிறார்கள். பருகப்   பருக இனிப்து தமிழ். முத்தமிழ் என்று இயல், இசை, நாடகத்தைச்   சொல்வார்கள். தாய் மொழியில் இவற்றைப் படிப்பதுபோல வருமா?

தங்கை:  ஓம் அண்ணா நீங்கள் சொல்வது சரிதான், மொழி புரியாததால் தான்   உள்நாட்டில் அத்தனை பிரச்சனைகளும் ஏற்பட்டன என்று அம்மா      சொன்னா

அண்ணா: உண்மைதான், மற்றவர்கள் தங்கள் மொழியில் எவ்வளவு அக்கறை  கொண்டிருக்கிறார்களோ அதே போல நாங்களும் எங்கள் மொழியைக்      காப்பாற்றுவதற்கு எல்லா முயற்சிகளையும் செய்யவேண்டும்.

தங்கை:  மொழியை மட்டும்தானா அண்ணா?

அண்ணா: மொழி மட்டுமல்ல, எங்கள் பண்பாடு, கலாச்சாரம் எல்லாவற்றையும் நாங்கள்  காப்பாற்றவேண்டும். நமது பெரியோர்கள் இதுவரைகாலமும் எங்கள்  மொழியை, பண்பாட்டை, கலாச்சாரத்தை இந்த மண்ணில் நிலைத்து      நிற்பதற்கு அரும்பாடு பட்டிருக்கிறார்கள். இவர்கள் விட்டுச் செல்லும்   இந்தப் பொறுப்பை அடுத்த தலைமுறையினரான நாங்கள்தான் ஏற்று  அதன்படி நடக்கவேண்டும்.

தங்கை:  நிச்சயமாக அண்ணா, இப்பொழுது எனக்குப் புரிகிறது நாங்கள் ஏன் தமிழ்  படிக்கவேண்டும் என்று!

அண்ணா: இதேபோல ஒவ்வொரு பெற்றோரும், பிள்ளைகளும் புரிந்து கொண்டால் எங்கள்    மொழியும், எங்கள் இனமும் என்றென்றும் புலம்பெயர்ந்த மண்ணில்      நிலைத்து நிற்கும்.

தங்கை:  உண்மைதான் அண்ணா, இதை ஒவ்வொரு மேடையிலும் எடுத்துச் சொன்னால்  அவர்கள் புரிந்து கொள்வார்கள். முகவரி அற்றவர்களாக எதிர்காலத்தில்  தங்கள்  பிள்ளைகள் இருப்பதைப் பொற்றோர்கள் விரும்பமாட்டார்கள்.

அண்ணா: அதுமட்டுமல்ல, தாய் மொழியின் அவசியம் பற்றிச் சின்னவயதில் ஏன்  தங்களுக்கு எடுத்துச் சொல்வில்லை என்று பிள்ளைகள் வளர்ந்தபின்    பெற்றோரைக் குற்றம் சாட்டலாமல்லவா?

தங்கை:  நிச்சயமாக, நான்கூட அப்பா அம்மாவைக் குற்றம் சாட்டியிருப்பேன்.

அண்ணா: நிலா, இப்பொழுதாவது தாய் மொழியின் அவசியத்தை நீ புரிந்து கொண்டாயே,    அதுவே போதும்.

தங்கை:  உண்மைதானண்ணா, இவ்வளவு காலமும் வேண்டா வெறுப்பாகத்தான் தமிழ்     படித்தேன். எனக்கு இப்போதுதான் புரிகிறது.

அண்ணா: பள்ளிக்கூடத்தில் உனக்கு ஒரு பாட்டுச் சொல்லித் தந்ததாகச் சொன்னாயே  அது என்ன பாட்டு?

தங்கை:  அதுவா, ‘தாய் மொழியாம் தமிழ் மொழி’ என்ற பாட்டு, அதுகூட வேண்டா வெறுப்பாய்தான் பாடமாக்கினேன், பாடிக்காட்டவா?

அண்ணா: எனக்கும் அந்தப் பாட்டுப் பாடம், இவர்களுக்குப் பாடிக் காட்டுவோமா?

தங்கை:  ஓம், இருவரும் சேர்ந்து பாடுவோமே..!

(தாய்மொழியாம் தமிழ்மொழி … பாடல் இடம்பெறவேண்டும்)
 தாய் மொழியாம் தமிழ் மொழி
தாய் மொழியாம் தமிழ் மொழி

அம்மா அப்பா சொன்ன மொழி
அப்பா அன்பாய் அழைத்த மொழி
அண்ணா அக்கா பேசும் மொழி
அதுவே எங்கள் சொந்த மொழி

தாய் மொழியாம் தமிழ் மொழி
தாய் மொழியாம் தமிழ் மொழி

பொதிகையிலே பிறந்த மொழி
சங்கத்திலே வளர்ந்த மொழி
தொன்று தொட்டு வாழ்ந்த மொழி
அதுவே எங்கள் சொந்த மொழி

தாய் மொழியாம் தமிழ் மொழி
தாய் மொழியாம் தமிழ் மொழி

பாட்டா பாட்டி தந்த மொழி
பண்பாய்ப் பழக ஏற்ற மொழி
முன்னோர் போற்றி வளர்த்த மொழி
உலகம் எல்லாம் போற்றும் மொழி.

தாய் மொழியாம் தமிழ் மொழி
தாய் மொழியாம் தமிழ் மொழி

(பாடல் முடிந்ததும் இருவரும் பார்வையாளர்களைப் பார்த்து வணங்கவேண்டும்)

பிரதியாக்கம்: குரு அரவிந்த​ன்.
பாடல்: குரு அரவிந்த​ன்


இந்த சிறுவர் நாடகத்தை மேடை ஏற்ற விரும்புவோர்
பிரதியாக்கம் செய்தவரின் பெயரைக் குறிப்பிடவும்.

Monday, May 9, 2011

KALAIMAGAL - கலைமகள்







கலைமகள் ராமரத்னம் குறு நாவல் போட்டி-2011

நடுவர்களின் பார்வையில்…

புலம் பெயர்ந்த தமிழர்களின் மனக்குமுறல்கள், புலம்பெயர்ந்த தமிழர்களின் பண்பாட்டுச் சின்னங்கள் இவைகளைத் தங்கள் நாவலில் வெளிப்படுத்தியதற்காக 'தாயுமானவர்' நாவலைத் தேர்வு செய்தோம். கதைக் களம், எடுத்துக் கொண்ட பொருளில் வேறுபட்ட தன்மை இவைகள் எங்களை வெகுவாகக் கவர்ந்தன.

திரு.பி. மணிகண்டன்
திரு.பா.ஸ்ரீதர்.
டாக்டர் லட்சுமி




Saturday, May 7, 2011

Bharradhi Kalaikkoyil - பாரதி கலைக் கோயிலின் திறன்காணல் நிகழ்வு – 2011

பலராலும் பாராட்டப் பெற்ற பவதாரணியின் பாரதி கலைக் கோயிலின் திறன்காணல் நிகழ்வு – 2011

(குரு அரவிந்தன்)

சையிலும் கலையிலும் ஆர்வமுள்ள பல கனடிய மணவ செல்வங்கள் ஆர்வத்தோடு கலந்து கொண்டு தங்கள் பல்வேறு வகைப்பட்ட திறமைகளின் ஒரு பகுதியை வெளிப்படுத்தும் ஒரு இனிய நிகழ்வாகச் சென்ற கிழமை நடைபெற்ற பவதாரணியின் பாரதி கலைக் கோயிலின் திறன் காணல் நிகழ்வு – 2011 அமைந்திருந்தது. பலராலும் பாராட்டப் பெற்ற பவதாரணியின் பாரதி கலைக் கோயிலின் இந்த திறன் காணல் நிகழ்வு – 2011, ஏப்ரல் மாதம் 22ம், 24ம் திகதிகளில், 610 Coronrtion Drive  வில் உள்ள IDOL Community Services மண்டபத்தில் இடம் பெற்றது. இந்த திறன் காணல் நிகழ்வில்  இசையிலும் கலையிலும் ஆர்வமுள்ள பல மாணவர்கள் கலந்து கொண்டனர். இறுதி நாளான ஞாயிற்றுக் கிழமை மாலை நடைபெற்ற நிகழ்வில் இளம் பாடகர்கள், நடன தாரகைகள், இசைக் கலைஞர்கள் பலர் கலந்து கொண்டு நிகழ்வைச் சிறப்பித்தனர். வித்தியாசமாக அமைந்திருந்த இந்த இலவச திறன் காணல் நிகழ்வின் மூலம் மண்டபத்தில் கூடியிருந்த மாணவச் செல்வங்களின் பெற்றோர்களும், இசைப்பிரியர்களும் சிறந்த அனுபவத்தைப் பெற்றுக் கொண்டனர்.

தன் உறக்கத்திலும் எம்மை விழித்திருக்கச் செய்திருக்கும் இசைத்தாய் பவதாரணி மதிவாசனின் ஆசியால் வேகமாக வளர்ந்து வரும் எம் கலைக்கோயில் ‘பவதாரணியின் பாரதி கலைக் கோயில்’ எனப் பெயர் மாற்றம் செய்யப்பட்டிருப்பதாக நிகழ்வில் அறிவிக்கப்பட்டபோது பலரும் கரகோசம் செய்து அந்த மாற்றத்தை வரவேற்றனர். பவதாரணியின் கற்பித்தல் முறையைப் பின்பற்றி அவருடைய வழிநடத்தலின்படி மாணவர்களுக்கு இலகுவாக இசை பயிற்றுவிக்கும் பாணியில் ஒரு பகுதியே இந்தத் ‘திறன் காணல்’ நிகழ்வாகும்.

அமரர் பவதாரணியின் பாரதி கலைக் கோயில் மாணவர்கள் கனடாவில் மட்டுமல்ல, இலங்கை, இந்தியா, ஐரோப்பிய நாடுகள் என்று சமீபத்தில் உலகெல்லாம் அவர்கள் இசைப்பயணம் மேற்கொண்டு தமது திறமைகளை வெளிக்காட்டியிருந்தது இசைப் பிரியர்களான உங்களுக்கு நினைவிருக்கலாம்.

விரல்விட்டு எண்ணக்கூடிய அளவு மாணவர்களோடு 1996ம் ஆண்டு ஆரம்பிக்கப்பட்ட பாரதி கலைக்கோயில் இன்று வளர்ந்து கிளைபரப்பி இசைத் தாகத்தைத் தீர்க்கும் கற்பகதருவாய் நிற்கிறது. இதன் வளர்ச்சிக்கு திரு. எஸ். மதிவாசனும் அவரது மனைவியான அமரர் பவதாரணி மதிவாசனுமே முக்கிய காரணமாக இருந்தனர். ‘இசைத்தாய்’ என்று மாணவர்களால் பாராட்டப்பட்ட பாரதி கலைக் கோயில் அதிபர் பவதாரணியின் திடீர் மறைவு மாணவர்களுக்கும், இசைப்பிரியர்களுக்குப் பெரியதொரு இழப்பாக இருந்தாலும் அந்த இழப்பை நிவர்த்தி செய்து பாரதி கலைக் கோயிலைத் தொடர்ந்தும் தலை நிமிர்ந்து நிற்க வைத்த பெருமை திரு. எஸ். மதிவாசனையும், அவரது உதவியாளர்களையுமே சேரும். பாரதி கலைக் கோயிலின் பெயரை அமரர் பவதாரணிக்குச் சமர்ப்பணமாக ‘பவதாரணியின் பாரதி கலைக் கோயில்’ என்று பெயர் மாற்றப்பட்டிருப்பதும் இங்கே குறிப்பிடத் தக்கது.


அமரர் பவதாரணியின் பாரதி கலைக் கோயிலால் பல நுண்கலைகளும், பாடநெறிகளும் புதிதாக ஆரம்பிக்கப்பட்டுள்ளன என்ற செய்தி மாணவர்களுக்கு மேலும் உட்சாகம் தருவதாக இருக்கின்றது. தமிழ், வாய்ப்பாட்டு, வீணை, மிருதங்கம், வயலின், பரதநாட்டியம், தபேலா, ட்றம்ஸ், கிட்றார், கீபோர்ட் போன்ற நுண்கலைத் துறைகளில் மாணவர்கள் கற்ற நெறிகளில் இருந்து திறன் காணல் நிகழ்வு இடம் பெற்றது. இதைவிட தமிழ், தியானம், யோகாசனம், வீடியோ படப்பிடிப்பு, போன்ற பல நுண்கலைகளும் இங்கே கற்பிக்கப்படுகின்றன. இந்த மாணவர்களின் திறமைகளை வெளிப்படுத்த உதவியாக இருந்த பாரதி கலைக் கோயில் ஆசிரியர்களும், தன்னார்வத் தொண்டர்களுமான நிசாந்தன் பாலகுமார், லசாந்தி ராஜ்குமார், மாலினி பரராஜசிங்கம், கிரிதரன் சச்சிதானந்தம், காண்டீபன் ரங்கநாதன், குகன் சிவசுப்ரமணியம், சஹானா ராஜசிங்கம், துபாரகன் சோதிலிங்கம், பிரவீன் மதிவாசன், பவித்ரா இரத்தினசிங்கம்,

மற்றும் கலைக்கோயில் அதிபர் மதிவாசன் சீனிவாசகம் ஆகியோரும், உதவி ஆசிரியர்களாகக் கடமையாற்றும் குயின்சி சோமசேகரம் நயனி இராமகிருஷ்னன், தட்சணன் உதயகுமார், செந்தூரன் மாணிக்கவாசகர், திவாகர் பாலயோகேஸ்வரன் ஆகியோரும், மேலும் நிகழ்ச்சி சிறப்பாக நடைபெறப் பின்னணியில் நின்று பாடுபட்ட நிலா முரளிதரன், யாழினி அருள், இரத்னேஸ்வரன், தன்னார்வத் தொண்டர்கள், பெற்றோர்கள் ஆகியோரும் நிச்சயமாகப் பாராட்டப்பட வேண்டியவர்கள்.

சென்ற வெள்ளிக் கிழமையும், ஞாயிற்றுக் கிழமையும், நடைபெற்ற இந்த நிகழ்வில் ரொறன்ரோவைச் சேர்ந்த பலகல்விமான்களும், பல்வேறு துறைசார் கலைஞர்களும் கலந்து கொண்டு நிகழ்வைச் சிறப்பித்தனர். இரு தினங்களாக நடைபெற்ற இந்த நிகழ்வில் மகாஜனக்கல்லூரி முன்னாள் அதிபர் திரு பொ. கனகசபாபதி, திரு. திருமதி பேராசிரியர் இ. பாலசுந்தரம், எழுத்தாளர்களான திரு. திருமதி குரு அரவிந்தன், கனடா உதயன் பத்திரிகை ஆசிரியர் ஆர் என். லோகேந்திரலிங்கம், கனடா தமிழ் எழுத்தாளர் இணையத் தலைவர் த. சிவபாலு, கதிர் ஒளி ஆசிரியர் இராஜபாண்டியன் போல்ராஜ், நாடக நெறியாளரும், மகாஜனாக் கல்லூரி பழைய மாணவர் சங்கத் தலைவருமான சாந்திநாதன், மூத்த கலைஞரும் நடிகருமான கே. எஸ். பாலச்சந்திரன், சிந்தனைப்பூக்கள் திரு. திருமதி பத்மநாதன், கலைஞர் மனுவல் ஜேசுதாசன், பேராசிரியர்களான திரு. திருமதி சுப்ரமணியன், நாடகக் கலைஞர் புராந்தகன், சினிமா கலைஞர் திருமதி பவானி, எழுத்தாளர் வேலாயுதபிள்ளை, கலைஞர் இராசநாயகம், எழுத்தாளர் சிவநாயகமூர்த்தி, முன்னாள் மகாஜனாக் கல்லூரி பழைய மாணவர் சங்கத் தலைவர் நந்தீஸ்வரர், கலாநிதி சிவகணேஷநாதன், ஆகியோர் சிறப்பு விருந்தினராகக் கலந்து கொண்டனர்.

திறன் காணல் நிகழ்வு சிறப்பாக நடைபெற,  தன்னார்வத் தொண்டர்களும், மாணவர்களும், பெற்றோர்களும்  கடமை உணர்வோடு முன்னின்று பாடுபட்டனர். வருடாவருடம் நடக்கும் இத்தகைய திறன் காணல் நிகழ்வுகள் மூலம் பாரதி கலைக் கோயில் நிறுவுனர் அமரர் இசைத்தாய் திருமதி பவதாரணி மதிவாசனின் கனவுகள் அக் கல்லூரி மாணவர்களின் பங்களிப்போடு ஒவ்வொன்றாக நிறைவேறுவதை நினைக்க எமக்கும் பெருமையாக இருக்கிறது.

பாரதி கலைக்கோயில் நிறுவனர் திரு.எஸ்.மதிவாசனின் வழிநடத்தலில் கலைஞர் திரு. டாக்டர் கதிர் துரைசிங்கம் நிகழ்ச்சிகளைக் கொண்டு நடத்தினார். இத்தகைய இசை நிகழ்வுகள் எம் இளம் சந்ததியினருக்கு பல கோணங்களிலும் உதவியாக இருப்பது மட்டுமல்ல, அவர்களது திறமைகளை அடையாளம் கண்டு அவர் தம் வளர்ச்சிக்கும் வழிகாட்டியாக அமையும் என்பதைப் பெற்றோர்கள் கவனத்தில் கொள்ள வேண்டும். தாம் கற்ற கலையை திறன் காணல் நிகழ்வின் மூலம் சபையில் சமர்ப்பித்துப் பலரின் பாராட்டையும் பெற்ற மாணவர்களுக்கும், அதற்கு ஊக்கமும் ஆக்கமும் தந்த பெற்றோருக்கும் எமது மனமார்ந்த பாராட்டுக்கள் உரித்தாகுக. பவதாரணியின் பாரதி கலைக் கல்லூரி தொடர்ந்தும் புலம் பெயர்ந்த மண்ணில் சிறப்பாகச் சேவையாற்றி, எனது மொழி, பண்பாடு, கலாச்சாரம், இசை, நுண்கலை, போன்றவற்றைப் பேணிக்காக்க வேண்டும் என்று மனதார வாழ்த்துகின்றோம். இறுதியாக பெரியவர் சிறியவர் என்ற பேதமில்லாமல் எல்லோரையும் மன மகிழவைத்த இந்த நிகழ்விற்கு ஊக்கம் தந்து உட்சாகம் கொடுத்த சிறப்பு விருந்தினர்களுக்கும், பெற்றோர்களுக்கும், தன்னார்வத் தொண்டர்களுக்கும், நிகழ்வில் கலந்து கொண்ட பார்வையாளர்களுக்கும் கலைக் கோயிலின் சார்பில் அதிபர் திரு. எஸ். மதிவாசன் அவர்கள் நன்றி தெரிவித்தார்.