Wednesday, October 26, 2011

Halloween - கலோவீன் தினம்

கலோவீன் தினம்         

குரு அரவிந்தன்


மேலை நாடுகளில் சிறப்பாகக் கொண்டாடப்படும் தினங்களில் கலோவீன் தினமும் (Halloween) ஒன்றாகும். ஒவ்வொரு வருடமும் ஐப்பசி மாதம் 31ம் திகதி கலோவின் தினம் அயர்லாந்து, இங்கிலாந்து, கனடா, அமெரிக்கா போன்ற மேலை நாடுகளிலும் இதர நாடுகளில் கொண்டாப் படுகின்றது. பெரியவர்களும் குழந்தைகளும் மிகவும்வேடிக்கையாக இத்தினத்தை இங்கே கொண்டாடுவர். ஊரிலே பிள்ளைகள் இரவிலே வெளியே திரிவதைத் தடுப்பதற்காகப் பெரியவர்கள் பேய்பிடிக்கும், பிசாசு அடிக்கும், கொள்ளிவால் பிசாசு தொடரும், முனி அடித்தால் வாயால் இரத்தம் கக்கும், என்றெல்லாம் சொல்லிப் பயமுறுத்துவதுண்டு. இப்படித்தான் எங்கள் வீட்டிற்கு சற்றுத் தள்ளியிருந்த புளிய மரத்தில் முனி இருக்கிறது என்றெல்லாம் சொல்லி இரவிலே வெளியே திரியாமல் எங்களுக்குப் பயம் காட்டிப் பெற்றோர் மிரட்டி வைத்திருந்ததை இத்தினங்களில் மீண்டும் நான் நினைவுபடுத்திப் பார்ப்பதுண்டு. இரவிலே வெளிக்கிட்டுத் திரிவதற்குப் பயந்து பயந்தே வாழ்ந்ததொரு காலமது.
பிரித்தானியாவில்தான் முதன்முதலாகக் கலோவீன்தினம் 2000 ஆண்டுகளுக்கு முன்பாகக் கொண்டாடப்பட்டது. அறுவடைக்காலம் முடிந்து குளிர்காலம் ஆரம்பிப்பதையும், வெளிச்சகாலம் முடிந்து இருட்டுக்காலம் தொடங்குவதையும் இந்தக் கொண்டாட்டம்  குறிக்கும். பழைய ஆங்கிலச் சொல்லான கலோவீன் என்றால் தெய்வீகத்தன்மை பெறச்செய்தல் என்ற கருத்துப்படும். பொதுவாக இத்தினத்தில் ஆரேஞ்ச் நிறமும் கறுப்பு நிறமும் அதிகமாகப் பாவிக்கப்படும். அரேஞ்ச் நிறம் அறுவடைக் காலத்தையும், கறுப்பு நிறம் இறப்பையும் குறிக்கும். அத்தினத்தில் பேய்கள் பிசாசுகள் போலப் பெரியவர்களும், சிறியவர்களும் வேடமிட்டு ஒவ்வொரு வீடுவீடாகச் சென்று வேடிக்கையாக விருந்து தரும்படி கேட்பார்கள். பெரியவர்கள் தெருவிலே நின்று கொள்ள, சிறுவர், சிறுமிகள் பேய் பிசாசுபோல வேடமிட்டு வாசலில் வந்து வேடிக்கையாக ஏமாற்றுவார்கள். சில சமயங்களில் வீட்டில இருப்பவர்களும் பயங்கரமான வேடமணிந்து விருந்து கேட்டு வந்த பிள்ளைகளுக்குப் பயம் காட்டுவார்கள். அதன்பின் பிள்ளைகள் கொண்டுவந்த தட்டிலே இனிப்பு, சொக்லட் போன்றவற்றைப் போடுவார்கள். மாலை 5மணியில் இருந்து இரவு ஒன்பது, பத்து மணிவரை அயலில் உள்ள வீடுகளுக்குச் சென்று (Tricks or Treats)  இனிப்பு வகைகளைச் சேகரிப்பார்கள். இப்படிச் சேகரித்துக் கொண்டு வந்தவற்றைத் தரம் பிரித்து பிடித்தவற்றைத் தாங்கள் எடுத்துக் கொண்டு வேண்டாத மிகுதியைப் பெற்றோரிடம் தள்ளி விடுவார்கள்.

கலோவின் தினத்திலன்று சூனியக்காரி, கறுப்புப் பூனை, வெளவால், ஆந்தை, சிலந்தி, சிலந்திவலை, எலும்புக்கூடு, மண்டை ஓடு, பூசணிக்காய், விளக்குமாறு, சூலம் போன்ற விளையாட்டுப் பொருட்களால் வீட்டின் வாசலை அலங்கோலம் செய்து வைத்திருப்பர். பெரிய பூசணிக்காயை (Jack-o-Lantern) எடுத்து அவற்றைப் பயங்கர முகங்களைப் போலச் செதுக்கி அதன் வடிவைமாற்றி வாசலில் வைத்திருப்பர். இருட்டில் இருக்கும் அவற்றில் மெழுகு திரிகளைக் கொளுத்தி மெல்லிய வெளிச்சத்தை ஏற்படுத்தியிருப்பர். பயங்கரமான இடத்தை நோக்கிப் போவது போன்ற ஒரு சூழலை இங்கே ஏற்படுத்தியிருப்பர். இந்த வாரத்தில் பெரியவர்கள் குழந்தைகளுக்குப் போய் பிசாசு கதைகள் சொல்வதிலும், அப்படியான பயங்கரப் படங்களைக் குடும்பமாகச் சென்று  பார்ப்பதிலும் அதிக நேரத்தைச் செலவிடுவர். நகரப் பகுதிகளில் இரவு நேரங்களில் கலோவீன் கேளிக்கை விருந்துகளுக்கு கலோவீன் ஆடைகள் அணிந்து முகத்திற்கு மைபூசிச் செல்வர்.

இந்த மாதத்தில் அனேகமான கடைகளில் கலோவின் தினத்திற்கான பொருட்களே முக்கிய வியாபாரப் பொருட்களாக இருக்கும். கலோவீன் ஆடைகள், முகமூடிகள் போன்ற பொருட்கள் அதிகமாக விற்பனையாகும். கலோவீன் கதைகள் அடங்கிய புத்தகங்கள், கலோவீன் புகைப்படங்கள், கலோவீன் ஒளிப்பட குறுந்தட்டுக்கள் போன்றவையும் அதிகம் விற்பனையாகும். அங்காடிகளில் பெரிய, சிறிய பூசணிக்காய்கள், ஆப்பிள் பழங்கள் விற்பனைக்காகக் குவிக்கப்பட்டிருக்கும். வேலைத்தலங்களில் மட்டுமல்ல, பாடசாலைகளிலும் ஆசிரியர்களும் மாணவர்களும் விதம் விதமான ஆடைகள் அணிந்து, முகத்திற்கு மைபூசி வருவார்கள். பெண்கள் தேவதைகள், மந்திரக்காரி, சூனியக்காரி போன்று ஆடைகள் அணிந்திருப்பர். காலோவீன் வாழ்த்து மடல்கள் வரைந்து ஒருவருக் கொருவர் பரிமாறிக் கொள்வர். பத்திரிகைகள் சிறுவர்களுக்கான கலோவீன் சித்திரம் வரையும் போட்டி, கலோவீன் நிறம் தீட்டும் போட்டி போன்றவற்றை இந்த வாரங்களில் நடத்துவர். பெரிய அங்காடிகளிலும் சிறுவர், சிறுமிகளை ஊக்குவிப்பதற்காக இப்படியான நிறம் தீட்டும் போட்டிகளை நடத்திப் பிள்ளைகளுக்குப் பரிசுகள் கொடுப்பர்.
இத்தினத்தில் அனேகமானவர்கள் முகமூடி போட்டும் உருமாற்றம் செய்தும் இருப்பதால் மாலை நேரத்தில் நகர் காவல் அதிகரிக்கப்பட்டிருக்கும். சிறுவர், சிறுமிகளின் பாதுகாப்புக் கருதி, மாலைநேரத்தில் குழந்தைகள் தனியே செல்லக்கூடாது என்ற அறிவுறுத்தலும் வழங்கப்பட்டிருக்கும். 1978ம் ஆண்டு கலோவீன் என்ற பெயரில் ஜோன் காப்பென்ரரின் நெறியாள்கையில் ஆங்கிலப் படம் ஒன்றும் வெளிவந்திருந்தது. 2007ம் ஆண்டு மீண்டும் கலோவீன் படம் ஒன்று இதே பெயரில் றொப் சோம்பியால் (Rob Zombie) படமாக்கப்பட்டது



Tuesday, October 4, 2011

Kalaimanram - கலைமன்றத்தின் 7வது பட்மளிப்புவிழா

கலைமன்றத்தின் 7வது பட்மளிப்புவிழா

மாலினி அரவிந்தன்

சென்ற ஞாயிற்றுக்கிழமை (02-10-2011) கலைமன்றத்தின் 7வது பட்மளிப்புவிழா யோக்வூட் மண்டபத்தில் மிகவும் சிறப்பாக நடைபெற்றது. பரதநாட்டிய உலகிற்கு அறிமுகமே தேவையில்லாத ஸ்ரீமதி நிறைஞ்சனா சந்துரு பற்றி நான் அதிகம் சொல்லத் தேவையில்லை. ஸ்ரீமதி திரிபுரசுந்தரி யோகானந்தம் அவர்களிடம் முறையாக நடனக்கலையைப் பயின்ற  ஸ்ரீமதி நிறைஞ்சனா சந்துரு அவர்கள் இன்று புகழ் பெற்ற நடன ஆசியையாகக் கனடாவில் திகழ்வது யாவரும் அறிந்ததே. நடனக்கலையில் திறமை மிக்க ஆசிரியர்களை உருவாக்க வேண்டும் என்ற உயரிய சிந்தனையோடு புலம் பெயர்ந்த மண்ணில் ஸ்ரீமதி நிறைஞ்சனா சந்துருவால் 1992ம் ஆண்டு ஆரம்பிக்கப்பட்டது தான் ‘கலைமன்றம்’ என்ற இந்த விருட்சம்.


இந்த விருட்சம் இன்று பல திசைகளிலும் கிளைகளைப் பரப்பிக் கம்பீரமாக நிமிர்ந்து நிற்பதைப் பார்க்கப் பெருமையாக இருக்கின்றது. சென்ற ஆண்டுவரை 31 நிருத்த நிறைஞர்களையும் 13 ஆசிரியர்தர டிப்ளோமா பட்டதாரிகளையும் உருவாக்கி இந்த மண்ணிலே எங்கள் இனத்திற்குப் புகழ் தேடித்தந்த பெருமை ஸ்ரீமதி நிரஞ்சனாவையே சாரும். ஆசியர்தர டிப்ளோமா பட்டதாரிகளான இவர்களில் பலர் இன்றும் தொடர்ந்து தமது கலைச் சேவையினை சுயமாகவும், தமது ஆசிரியர்களுடன் இணைந்தும் வழங்கி வருவது பாராட்டுக்குரியது.

ஏழாவது பட்டமளிப்பு விழாவான அன்று மீண்டும் புதிதாக அவர் உருவாக்கிய நடனதாரகைகள் எங்கள் பண்பாடு, கலை, கலாச்சாரத்தை பேணிக்காக்கும் தூயநோக்கோடு எங்கள் முன் மேடையில் அமர்ந்திருந்தார்கள். அவர்களில் 14 மாணவர்கள் ஆசிரிய தரத்தைக் கொண்டவர்கள். அவர்களில் 7 மாணவர்கள் நிருத்த நிறைஞர்களாவார். ஸ்ரீமதி நிரஞ்சனா சந்துருவின் அயராத உழைப்பை ஆசிரியர்களாகப்போகும் இவர்களின் வடிவில் அங்கே காணமுடிந்தது. அன்று நிருத்த நிறைஞர் பட்டம் பெற்ற சகானாவின் நடன அரகேற்றத்தில் கலந்து கொள்ளும் சந்தர்ப்பம் எனக்கு எதிர்பாராமல் கிடைத்திருந்தது. முன்னாள் மகாஜனாக் கல்லூரி அதிபரின் அன்பான வேண்டுகோளுக்கு இணங்க சகானாவின் பெற்றோர்களான திரு. திருமதி  கார்வண்ணதாசன் அவர்கள் தமது மகளின் நடன அரங்கேற்றத்தில் கலந்து கொள்ளும்படி எனது குடும்பத்தையும் அழைத்திருந்தனர். பிராம்டனில் உள்ள றோஸ் தியேட்டரில் யூலை மாதம் 9ம் திகதி நடைபெற்ற சகானாவின் அந்த அரங்கேற்றத்தில் நாங்களும் மகிழ்ச்சியோடு கலந்து கொண்டு சகானாவின் திறமையைப் பாராட்டினோம். ஸ்ரீமதி நிரா சந்துருவின் மாணவிதான் சகானா என்பதை அறிந்து அன்று மிகவும் பெருமைப்பட்டேன இசையில் இருந்த ஆர்வம் காரணமாக சகானா, இசைக்கலைமணி வர்ண. இராமேஸ்வரன் அவர்களிடம் வாய்ப்பாட்டு பயின்றது மட்டுமல்ல, கீ போட் இசைப்பதிலும் திறமை பெற்றிருக்கின்றார். வாய்ப்பாட்டில் இவர் 2ம்தரத்திலும், கீபோட்டில் 4ம் தரத்திலும் சித்தி பெற்றிருக்கின்றார். சென்ற வாரம் நடைபெற்ற மகாஜனாக் கல்லூரி முத்தமிழ் விழாவில் இடம்பெற்ற இசை நிகழ்ச்சியில் அவர் கீபோட் வாசித்துச் சபையினரின் ஏகோபித்த பாராட்டைப் பெற்றபோது அவரது திறமையை என்னால் அன்று நேரடியாகவே அவதானிக்க முடிந்தது. எங்கள் தாய் மொழியாம் தமிழ் மொழியில் மிகவும் திறமை கொண்ட சகானா பன்னிரண்டாம் தரத்திற்குரிய தமிழ் திறமையைக் கொண்டிருக்கின்றார். நாட்டிய ஆசிரிய தராதரப் பரீட்சைக்காக சகானா இந்து மதமும் பரதநாட்டியமும் என்ற தலைப்பில் ஓர் ஆய்வுக்கட்டுரை ஒன்றையும் எழுதியுள்ளார். இந்துமதம் என்றால் என்ன, பரதநாட்டியம் என்றால் என்ன, இந்த இரண்டுக்கும் இடையே உள்ள தொடர்பு என்ன என்பது பற்றி மிகவும் தெளிவாக எழுதியிருக்கின்றார்.
ஸ்ரீமதி நிரஞ்சனாவைப் போலவே கலையார்வம் கொண்ட கணவர் திரு. சந்துரு அவர்களதும், பிள்ளைகளினதும் ஈடுபாடும், ஒத்துழைப்பும் இந்தக் கலைமன்றத்தின் வளர்ச்சிக்கு மேலும் உரம் சேர்த்தன என்பதை நாம் மறக்கமுடியாது. அதேபோல தங்கள் பிள்ளைகளுக்கு ஏதாவது ஒரு கலையையாவது கற்பிக்க வேண்டும் என்ற சிறந்த நோக்கத்தோடு செயற்படும் பெற்றோரும் கட்டாயம் பாராட்டப்பட வேண்டியவர்கள். அவர்கள் இல்லாவிட்டால் இந்தப் பல்கலாச்சார மண்ணில் கலை வளர்க்க, எங்கள் பெருமைபேசச் சந்தர்ப்பமே இல்லாது போய்விடக்கூடும்.

Sunday, October 2, 2011

மகாஜனாவின் முத்தமிழ் விழா – 2011 - Mahajana OSA Canada

மகாஜனாவின் முத்தமிழ் விழா – 2011

மாலினி அரவிந்தன்

சென்ற சனிக்கிழமை (24-09-2011) மகாஜனாக்கல்லூரியின் முத்தமிழ் விழா ரொறன்ரோ லோறன்ஸ் அவன்யூவில் உள்ள வின்சன் சேர்ச்சில் கலை அரங்கில் மிகவும் சிறப்பாக நடைபெற்றது. விழாவை நிர்வாகசபை அங்கத்தவர் திரு. சந்திரலிங்கம் ஏற்கனவே குறிப்பிட்டது போல மாலை 5:40 க்கு சரியாக ஆரம்பித்து வைத்தார். விழாவிற்கு வருகை தந்தவர்கள், மகாஜனாவின் பாரம்பரியம் அறிந்த கலை ரசிகர்கள் என்பதால் விழா ஆரம்பமாகிய போதே அரங்கம் நிறைந்திருந்தது.


இலங்கையில் இருந்து வருகை தந்த திரு. ஜெயவர்மன், முன்னாள் ஆசிரியர் திரு. திருமதி யோகரட்ணம், மன்றத் தலைவர் திரு. திருமதி சாந்திநாதன் ஆகியோர் மங்கள விளக்கேற்றியதைத் தொடர்ந்து கனடிய தேசிய கீதம் செல்வி வைஷ்ணவி ஞானபாவானால் இசைக்கப்பட்டது. தொடர்ந்து கல்லூரிக்கீதம் மகாஜனா பழைய மாணவர் சங்க நிர்வாகசபை உறுப்பினர்களால் பாடப்பட்டு, அகவணக்கம் செலுத்தப்பட்டது. அதைத் தொடர்ந்து நிர்வாகசபை அங்கத்தினரும் கலைஞருமான எஸ். சிவதாசனின் வரவேற்புரை இடம் பெற்றது.


அனேகமான விழாக்களில் இடைவேளையுடன் சிலர் எழுந்து சென்றுவிடுவார்கள். ஆனால் இந்தவிழாவில் இறுதிவரை இருந்து பாராட்டிவிட்டுச் சென்ற உண்மையான கலை ரசிகர்களைக் காணமுடிந்தது. மேடையில் நடித்த பாத்திரங்களோடு தாங்களும் ஒன்றிப்போய் அவர்கள் அழும்பொழுது தாங்களும் அழுது, அவர்கள் சிரிக்கும்போது தாங்களும் கைதட்டிச் சிரித்து மகிழ்ந்த பார்வையாளர்களால் அரங்கமே நிறைந்திருந்தது.


கடந்த பல வருடங்களாகக் குறிப்பிட்ட நேரத்திற்குத் தொடங்கி குறிப்பிட் நேரத்தில் முடிக்கும், பலராலும் பேசப்படும் ஒரு கலைவிழாவாக மகாஜனாவின் முத்தமிழ் விழா கலைரசிகர்களின் மனதில் நீங்காத இடம் பிடித்துவிட்டது.

முதலாவது நிகழ்ச்சியாக யசோதா அரவிந்தனின் இசையில் இளம் விரல்கள் என்ற இசை நிகழ்ச்சி இடம் பெற்றது. மகாஜனாக் கல்லூரி முன்னால் அதிபர் கிரு. பொ. கனகசபாபதி அவர்கள் இதுபற்றிக் குறிப்பிடும்போது, விழாவின் ஆரம்பமே ஒரு தெய்வீகத் தன்மையோடு தொடங்கியதை அவதானிக் முடிந்தது என்றும், திரை விலகியதும் கருவறையில் கலைமகளே வீணையுடன் வீற்றிருப்பது போன்ற ஒரு காட்சி மனதில் பதிந்ததாகவும் அவர் குறிப்பிட்டார். அடுத்து பரதக்கலாவித்தகர் சியாமா தயாளனின் தயாரிப்பில் பாரதி இந்திய சாஸ்திரிய நடனக்கல்லூரி மாணவர்களின் எதுவும் கடந்து போகும் என்ற நடன நிகழ்ச்சி இடம் பெற்றது.


பலராலும் பாராட்டப்பட்ட அந்த நடன நிகழ்ச்சியைத் தொடர்ந்து நா. சாந்திநாதனின் நெறியாள்கையில், வைரமுத்து சொர்ணலிங்கத்தின் பிரதியாக்கத்தில் துளிரும் சருகுகள் என்ற நாடகம் இடம் பெற்றது. நாடகக் கலைஞர்களான இராஜரத்தினம், அன்ரன் பிலீக்ஸ் ஆகியோர் தங்கள் திறமையான நடிப்பால் சபையோரைக் கண்கலங்க வைத்தனர். அடுத்து ஆடலரசி செந்தில்செல்வி சுரேஸ்வரனின் தயாரிப்பில் ஸ்ரீஅபிராமி நாட்டியாலய மாணவர்களின் கரங்கள் இணைந்தால் என்ற நடன நிகழ்ச்சி இடம் பெற்றது. பஞ்சதந்திரக் கதைகளில் இருந்து ஒரு காட்சியை மேடையேற்றியது வித்தியாசமானதாயும், பாராட்டக்கூடியதாயும் இருந்தது.


கீதா ஸ்ரீஸ்கந்தாவின் தயாரிப்பில் மகாஜனாவின் வழித்தோன்றல்கள் வழங்கிய பிறீமா நடனக்கல்லூரியின் சினித்துளிகள் நடனம் அடுத்து இடம் பெற்றது. மகாஜனாவின் வழித்தோன்றல்கள் என்பதால் சபையினர் மிகவும் ஆர்வத்தோடு அவதானித்தனர். அதைத் தொடர்ந்து ஜெ. சுஜனின் உருவாக்கத்தில், எஸ். தவத்தின் உதவியோடு காரை. மணிவண்ணனின் பிரதியாக்கத்தில் முறிக்க முடியாத முகங்கள் என்ற நாடகம் இடம் பெற்றது.


சிரிக்கவும் சிந்திக்கவும் வைத்த இந்த நாடகத்தில், கணபதி ரவீந்திரன், ரூபி யோகதாசன், ஸ்ரீமுருகன், ஜெ.சுஜன், சண்முகதாசன், எஸ்.ஜனனி, எஸ். ராகவன் ஆகியோர் பங்குபற்றி நாடகத்தைச் சிறப்பித்தனர். பெரியவர்களும், சிறியவர்களும் வாய்விட்டுச் சிரிக்கக்கூடியதாக இந்த நாடகம் அமைந்திருந்தது.


கனடா பழைய மாணவர் சங்கத் தலைவர் நா. சாந்திநாதனின் தலைமை உரையைத் தொடர்ந்து இலங்கையில் இருந்து வருகை தந்த திரு. எஸ். ஜெயவர்மனின் விருந்தினர் உரை இடம் பெற்றது. அடுத்து விழா சிறப்பாக நடைபெற நிதியுதவி செய்தோர் கௌரவிக்கப்பட்டனர். இதைத் தொடர்ந்து  முன்னாள் மகாஜனக்கல்லூரி அதிபர் திரு. பொ. கனகசபாபதியின் உரை இடம் பெற்றது. அவரின் உரையைத் தொடர்ந்து கனடிய பாராளுமன்ற உறுப்பினர் கௌரவ ராதிகா சிற்சபைஈசனின் உரை இடம் பெற்றது.
மகாஜனாக்கல்லூரி பழைய மாணவர் சங்கம் மாணவர்களுக்காக நடத்திய போட்டிகளில் பங்குபற்றிப் பரிசு பெற்றவர்கள் மேடையில் பரிசளித்துக் கௌரவிக்கப்பட்டனர். இந்த நிகழ்வில் பழைய மாணவர் சங்கப் போசகர்கள் பங்குபற்றி வெற்றியாளர்களைக் கௌரவித்தனர்.


இறுதி நிகழ்வாக இசைக்கலைமணி சங்கீத மிருதங்க கலா வித்தகர் வர்ண. இராமேஸ்வரனின் இசையில் நட்சத்திர கானங்கள் இடம் பெற்றன. கனடியப் பிரபலங்களான எம். விஜிதா, எம். சாயிசன், எலிசபெத்மாலினி, கே. நிர்ஜானி ஆகியோர் இந்த இசைநிகழ்ச்சியில் பங்கு பற்றிச் சிறப்பித்தனர். தொடர்ந்து வர்ண. இராமேஸ்வரனின் பாடலும் இடம் பெற்றது. ஒவ்வொரு பாடகர்களும் பாடி முடிந்ததும் பார்வையாளர்களின் கரவோசை சபையை அதிரவைத்தது.


இவ்விழாவின் அறிவிப்பாளர்களாக செல்வகுமார், சுஜிதா அஜந்தன், வைஷ்ணவி ஞானபவான், விதுரா ஜெயேந்திரன் ஆகியோர் சிறப்பாகக் கடமையாற்றினர். இறுதியாக மன்றச் செயலாளர் திரு. இரவீந்திரனின் நன்றியுரையுடன் மாலை 5: 40க்கு ஆரம்பமாகிய விழா சரியாகப் 10: 30 க்கு இனிதே நிறைவு பெற்ற போது பலரும் நம்பமுடியாமல் கடிகாரத்தைப் பார்த்த காட்சி இப்பொழுதும் கண்ணுக்குள் நிறைந்து நிற்கின்றது.

இந்தவிழா மிகவும் சிறப்பாக நடைபெற முன்னின்று உழைத்த நிர்வாகசபை உறுப்பினர்களும், மகாஜனாக் கல்லூரி பழைய மாணவர்களும், மற்றும் பங்குபற்றிய கலைஞர்களும், தன்னார்வத் தொண்டர்களும், நிதி உதவி வழங்கியவர்களும் நிச்சயம் பாராட்டப்பட வேண்டியவர்கள். நிர்வாகசபை அங்கத்தினர் சீருடையுடன் அங்குமிங்கும் நடமாடியதே கண்ணுக்கு விருந்தாக இருந்தது.


சென்ற வருடம் மகாஜனாக் கல்லூரியின் நூற்றாண்டு விழாவை கனடாவில் மிகவும் சிறப்பாகக் கொண்டாடியதும், இந்த வருடம் மொன்றியல் கலைஞர்களின் ஒத்துழைப்போடு மொன்றியலில் கலைவிழா ஒன்றைச் சிறப்பாக நடத்திப் பாராட்டுப் பெற்றதும் இங்கே குறிப்பிடத்தக்கது. மீண்டும் இது போன்ற சிறப்பான ஒரு முத்தமிழ் விழாவை 2012ல் எதிர்பார்த்துக் காத்திருப்பதில் மனம் ஏங்கித் தவிக்கின்றது.