Thursday, January 26, 2012

Costa Conkodia - கோஸ்டா கொங்கோடியா

Costa Conkodia


விபத்தில் சிக்கிய கோஸ்டா கொங்கோடியா
(குரு அரவிந்தன்)
அவன் தலையிலே கைவைத்துக்கொண்டு அதிர்ச்சியில் உட்கார்ந்திருந்தான். ‘என்னப்பா கப்பல் கவிண்டு விட்டது போல உட்கார்ந்திருக்கிறாய்’ என்று நண்பன் கேலி செய்தபோது தான் உண்மையிலே கப்பல் கவிண்டு விட்டது என்ற உண்மை நண்பனுக்குத் தெரிய வந்தது. ஆமாம் சென்ற வெள்ளிக்கிழமை இத்தாலிய கப்பல் ஒன்று தரைதட்டிக் கவிழ்ந்து விட்டது. கவிண்டது சரக்குக் கப்பலல்ல, உல்லாசப் பயணிகளை ஏற்றிச் செல்லும் பிரமாண்டமான ஆடம்பரக் கப்பல். யார்யாரையோ நம்பிப் பாதுகாப்பில்லாத கப்பலில் பயணம் செய்வது என்பது எவ்வளவு ஆபத்தானது என்பதை இப்பொழுதுதான் உல்லாசப் பயணிகள் உணர ஆரம்பித்திருக்கிறார்கள். இப்படித்தான் உல்லாசப் பயணிகளோடு சென்ற ரைற்ரானிக் கப்பலுக்கும் நூறு வருடங்களுக்கு முன் ஒரு விபத்து நடந்தது. எந்த ஒரு ஆபத்தையும் சந்திக்கத் தயாரக இருக்கிறது அந்தப் பிரமாண்டமான ரைற்ராணிக் கப்பல் என்றுதான் அப்போது விளம்பரம் செய்தார்கள். ஆனால் அந்த நம்பிக்கையை அந்தக் கப்பல் காப்பாற்றவில்லை. அந்தக் கப்பல் பனிப்பாறையில் மோதி உடைந்தபோது யதார்த்தம் வேறுவிதமாக இருந்தது. அந்தக் கப்பல் பல உயிர்களைக் காவுகொண்ட சம்பவத்தை இன்றும் பயணிகள் நினைத்து பயப்படுகின்றார்கள்.
ரைற்ரானிக் கப்பல் 15-04-1912 விபத்துப் போலத்தான் இந்தக் கோஸ்டா கொங்கோடியா என்ற ஆடம்பர சொகுசுக் கப்பல் விபத்தும் 13-01-2012 ஏற்பட்டது. கன்னிப்பயணத்தை மேற்கொண்டிருந்த ரைற்ரானிக் கப்பலில் 2223 பயணிகள பயணித்திருந்தனர். 1500 மேற்பட்ட பயணிகள் அன்று நடந்த விபத்தில் கொல்லப்பட்டனர். இந்தக் கோஸ்டா கொங்கோடியா கப்பல் பாதைமாறிப் பயணித்தபோது அதை ஏன் காப்டனோ அல்லது சிப்பந்திகளோ கவனத்தில் கொள்ளவில்லை என்பதுதான் இன்றும் கேள்விக் குறியாகவே இருக்கின்றது. நூறு வருடங்களைக் கடந்து விட்டாலும் உல்லாசக் கப்பலில் பயணம் செய்யும் பயணிகளின் பாதுகாப்பு விடையத்தில் எந்த மாற்றமும் ஏற்படவில்லை என்பதையே இது காட்டுகின்றது. கிக்லியோ தீவுக்கு அருகே நடந்த இந்த விபத்தில் இதுவரை 11 பயணிகள் இறந்து விட்டதாகவும், 24 பயணிகள் காணாமல் போய்விட்டதாகவும் தெரிய வருகின்றது. கடைசிவரை அங்கே நின்று பயணிகளைக் காப்பாற்ற வேண்டிய கப்பல் கப்டனே அந்த இடத்தைவிட்டு வெளியேறி விட்டதாகச் சில செய்திகள் தெரிவிக்கின்றன. இத்தாலியில் உள்ள பின்கன்ரெறி என்ற கப்பல் கட்டும் நிறுவனத்தால் 2006ம் ஆண்டு இந்தக் கப்பல் சேவைக்கு விடப்பட்டது. 450 மில்லியன் ஈரோ நாணயப் பெறுமதி கொண்டது. 3780 பயணிகளை ஏற்றிச் செல்லும் வசதி கொண்டது. 1500 அறைகளையும், ஐந்து உணவு விடுதிகளையும், பதின்மூன்று மதுச்சாலைகளையும் கொண்டது. இந்தக் கப்பலில் நான்கு நீச்சல் தடாகங்களும் உண்டு. இதைவிட அழகு சாதன நிலையம், உடற்பயிற்சி நிலையம், விளையாட்டரங்கு, சினிமா தியேட்டர், சீட்டாடுமிடம், டிஸ்கோ நடனமாடும் மண்டபம் என்று பல வசதிகளைத் தன்னகத்தே கொண்டது.
விபத்து நடந்தபோது 4200 பயணிகளுக்குமேல் கப்பலில் இருந்ததாகத் தெரியவருகின்றது. கரையோரப் பாதுகாப்புப் படையினர் தேடுதல் நடவடிக்கையில் ஈடுபட்டிருக்கின்றார்கள். கரையோரத்தில் நடந்த விபத்து என்பதால் அதிக உயிர்ச் சேதம் ஏற்படாமல் தப்பிக் கொண்டார்கள். விபத்து நடந்ததும் உயிர் காப்புப் படகுகளுக்குக் காத்திராமல் பயணிகள் பலர் கடலில் குதித்து நீந்திக் கரை சேர்ந்திருக்கிறார்கள். கப்பலுக்குள் சிக்கிக் கொண்டவர்களின் விபரம் ஒன்றும் தெரியவில்லை. சரிந்த கப்பலில் சுமார் நான்கு இடங்களிளில் வெடி வெத்து தகர்த்து அதனூடாகத் தேடுதல் நடவடிக்கை மேற்கொண்டிருக்கிறார்கள். காணாமல் போனவர்களில் யேர்மனியர்கள், இத்தாலியர், பிரான்ஸ் நாட்டைச் சேர்ந்தவர்கள், அமெரிக்கர்கள், இந்தியர்கள், ஹங்கேரியர் ஆகியோர் அடங்குவர். இந்தக் கப்பலில் 300 மேற்பட்ட இந்திய சிப்பந்திகள் தொழில் புரிந்ததாகத் தெரிய வருகின்றது. இவர்களில் சுமார் பத்துப்பேர் தமிழ் நாட்டைச் சேர்ந்தவர்கள். சரிந்த கப்பலில் இருந்து எரிபொருளான எண்ணெய்யை வெளியேற்றுவதில் வேறு ஒரு குழவினர் ஈடுபட்டிருக்கிறார்கள். 1.9 மில்லியன் லிற்ரர் எரிபொருள் இந்தக் கப்பலின் பாவனைக்காக இந்தக் கப்பலில் கொண்டு செல்லப்பட்டது. பதினேழு கொள்கலன்களில் இவை நிரப்பப்பட்டிருக்கின்றன. எந்த நேரமும் தீ விபத்து ஏற்படலாம் என்ற எச்சரிக்கை உணர்வு மட்டுமல்ல, சூழல் பாதுகாப்பும் முக்கிய காரணமாக இருக்கின்றது. எரிபொருள் கடலில் கலக்கும் பட்சத்தில் சூழல் மாசடையச் சந்தர்ப்பம் உண்டு. எனவே கப்பல் முற்றாக மூழ்கிப் போகுமுன் இந்த எரிபொருள் வெளியேற்றும் நடவடிக்கையை அவசரமாக மேற்கொண்டிருக்கிறார்கள். இந்தத் கடலில் டொல்பின், திமிங்கிலம் போன்ற கடல் வாழ் இனங்கள் அதிகம் வசிப்பதால் அவற்றின் பாதுகாப்பும் முக்கியமாகக் கவனிக்கப்படுகின்றது.
ஏன் இந்த விபத்து நடந்தது, விபத்திற்குக் காரணம் என்னவென்று தெரிந்து கொள்ளும்வரை கோஸ்டா கொங்கோடியா கப்பலில் காப்டனான பிரான்ஸிஸ்கோ செச்சிட்டினோவை விளக்க மறியலில் வைக்கும்படி உள்ளுர் நீதிபதி உத்தரவிட்டிருக்கின்றார். சென்ற வருடம் ஆகஸ்ட் மாதம் இந்தத் தீவில் நடந்த சூட்டிங் ஸ்டார் நைட் விழாவின்போது இரவுநேரத்தில் இந்தக் கப்பல் பயணிகளை மகிழ்விக்கும் பொருட்டு, தீவிற்கு மிக அருகாமையில் பயணித்தாகவும் தெரிய வருகின்றது. இம்முறை அதற்குரிய அனுமதி கொடுக்கப்படவில்லை என்று அதிகாரிகள் குறிப்பிட்டனர். வுpபத்து நடந்தால் ஆபத்து நேரத்தில் எப்படி நடந்து கொள்ள வேண்டும் என்பது பற்றிச் சிப்பந்திகளுக்குத் தகுந்த முறையில் பயிற்சி கொடுக்கப்பட வேண்டும். பயிற்சி பெற்றாலும் அவர்களும் அந்த நேரத்தில் அதற்கு ஏற்ற மாதிரி நடந்து கொள்ள வேண்டும். என்னதான் உயிர் காக்கும் சாதனங்கள் குவிந்து கிடந்தாலும் அவற்றை ஆபத்து நேரத்தில் பாவிக்கத் தெரியாவிட்டால் அவற்றால் எந்தப் பிரயோசனமும் இல்லை. ரைற்ரானிக் கப்பல் விபத்தின்போது எப்படி எல்லோரும் அல்லோல கல்லோலப்பட்டார்களோ அதே நிலைதான் இந்தக் கோஸ்டா கொங்கோடியா கப்பல் விபத்தின்போதும் நடைபெற்றிருக்கின்றது. தேவையான நேரத்தில் உயிர்காக்கும் படகுகள்கூட இறக்கி விடப்படவில்லை என்பதே உயிர்தப்பிய பயணிகளின் குறையாக இருந்தது. நூறு வருடங்கள் கடந்தாலும் பாதுகாப்பு முறையில் எந்த மாற்றங்களும் ஏற்படவில்லை. இனிமேலாவது இப்படியான விபத்துக்கள் நடைபெறும்போது உயிர் பாதுகாப்பு நடவடிக்கைகளை எப்படி நடைமுறைப்படுத்த வேண்டும் என்ற சட்டத்தைத் திருத்தி அமைக்க வேண்டும் என்று தீர்மானம் எடுக்கப்பட வேண்டும். அதுவே எதிர் காலத்தில் உல்லாசப் பயணிகளின் கப்பல் போக்குவரத்து வளர்ச்சிக்;கு உதவியாக இருக்;கும் என எதிர்பார்க்கலாம்.


பாட்டுப் பாடவா? Cinema Songs

பாட்டுப் பாடவா?

(குரு அரவிந்தன்)

தமிழ் சினிமாவைப் பொறுத்த வரையில் எந்தப் படமும் திரைக்கு வருமுன் அந்தப் படத்தின் பாடல்களே அப்படம் அதிக நாள் ஓடுமா இல்லையா என்பதை ஓரளவு தீர்மானிக்கின்றன. பாட்டை வைத்துக் கொண்டே படம் எப்படி இருக்கும் என்று தீர்மானித்த காலம் போய், இப்போதெல்லாம் பாடல் காட்சியை வைத்துத் தீர்மானிக்கத் தொடங்கி விட்டனர். பழம் பெரும் இசையமைப்பாளர்களைக் கவனித்தால் அவர்கள் எவ்வளவு தூரம் ஒரு பாட்டிற்கு இசையமைப்பதற்கு தங்கள் நேரத்தையும், காலத்தையும் செலவிட்டார்கள் என்பது தெரியவரும். அந்த நாட்களில் அவர்கள் மிகவும் குறைந்த வசதிகளோடு மிகவும் கஸ்டப்பட்டு இசை அமைத்ததாலோ என்னவே அந்தப் பாடல்கள் பலரின் மனதிலும் இப்பொழுதும் நிலைத்து நிற்கின்றன. சொற்ப வசதிகளே இருந்ததால், இசைக் கருவிகளைப் பாவித்தே அந்த நாட்களில் இசை அமைக்கக்கூடியதாக இருந்தது. ஆனால் இன்று கணனி யுகத்தில் இவை எல்லாம் இலகுவாகச் செய்ய முடிகின்றன. முன்கூட்டியே இசையமைப்பாளர்களால் பதிவு செய்யப்பட்ட இசையை வைத்துக் கொண்டு புதிய பாடல்களுக்கு ஏற்றவாறு இலகுவில் அவற்றைக் கணனி மூலம் கலக்கிக் கொடுக்க  அவர்களால் முடிகின்றது.
பழம் பெரும் நடிகர்களான பி.யூ. சின்னப்பா, எம். கே. தியாகராஜபகவதர், டி.ஆர். மகாலிங்கம், கே.பி. சுந்தராம்பாள் போன்றவர்கள் தாங்களே பாடியும் நடிக்கவும் செய்தார்கள். அந்தக் குறைகள் எல்லாம் தொழில் நுட்பவசதிகள் காரணமாக இப்போ நீக்கப்பட்டுவிட்டன.


சென்ற வருடம் நிறையவே தமிழ் படங்கள் வெளிவந்தாலும், நிறையவே இசையமைப்பாளர்கள் இசை அமைத்திருந்தாலும், மிகச்சிறந்த இசையைத் தந்த இசையமைப்பாளர் விரிசையில் ஏ.ஆர். ரஹ்மான், இளையராஜா, யுவன் சங்கர் ராஜா, ஜீ.வீ. பிரகாஷ்குமார், இமாம் போன்றவர்களைக் குறிப்பிடலாம். இவர்களில் இசைஞானி இளையராஜா சுமார் 4235 பாடல்களுக்கு இதுவரை இசை அமைத்திருப்பதாகத் தெரியவருகின்றது. இரண்டாவது இடத்தை (1096) தேவாவும், மூன்றாவது இடத்தை (525) யுவன் சங்கர் ராஜாவும், நாலாவது இடத்தை (491) வித்தியாசாகரும், ஐந்தாவது இடத்தை (470) ஏ.ஆர். ரஹ்மானும் பெற்றிருக்கிறார்கள்.


சில பாடல்கள் எப்பொழுதும் நெஞ்சில் நிறைந்து நிற்பதுண்டு. நல்ல இசை என்பது, கேட்பவரை மனம் லயிக்கச் செய்ய வேண்டும். சென்ற வருடமும் அப்படிச் சில பாடல்கள் நல்ல இசையோடு வெளிவந்தன. ‘மன்னிப்பாயா’ என்ற பாடலை இசையார்வமுள்ள சற்று வயதானவர்களும், ‘ஹோசானா’ என்ற பாடலை இளம் வயதினரும் இன்றுவரை முணுமுணுத்துக் கொண்டிப்பதை மட்டுமல்ல, இங்கே நடக்கும் எந்த இசை நிகழ்ச்சிகளிலும் அந்தப் பாடல்கள் இடம் பெறுவதை நீங்கள் அவதானித்திருக்கலாம். இந்தப் பாடல்களுக்கு இசை அமைத்தவர் வேறுயாருமல்ல, 2009ம் ஆண்டு இரட்டை ஆஸ்கார் விருது பெற்று சாதனை படைத்த ஏ.ஆர். ரஹ்மான்தான். சென்ற வருடம் விண்ணைத்தாண்டீ வருவாயா, ராவணன், எந்திரன் போன்ற படங்களுக்கு இவர் இசையமைத்திருந்தார். விண்ணைத் தாண்டி வருவாயா படத்தின் பாடல்களின் வெற்றியைத் தொடர்ந்து ராவணன் படத்தில் இடம் பெற்ற பாடலான ‘உசுரே போகுதே’ என்றபாடலும் எந்திரன் படத்தில் வந்த ‘கிளிமாஞ்சாரோ’, ‘இரும்பிலே ஒரு இதயம’; போன்ற பாடல்களும் இரசிகர்களிடையே மிகுந்த ஆதரவைப் பெற்றிருந்தன. இசைக்காக இத்தகைய பாடல்கள் பிரபலமடைந்தாலும், இத்தகைய பாடல்களில் பிறமொழிச் சொற்களின் கலவையால், அல்லது தப்பான உச்சரிப்பால் தமிழின் இனிமை குன்றிப் போயிருப்பதைத் தெளிவாக அவதானிக்க முடிந்தது.

அதிக பாடல்களுக்கு இசை அமைத்த பெருமை இசைஞானி இளையராஜாவையே சேரும். பின்னணி இசைக்காகத் தேசிய விருதைப் பெற்ற பழசிராஜா என்ற மழலயாளப்படத்திற்கும் இவரே இசை அமைத்திருந்தார். நந்தலாலா படத்திற்கு இசை அமைத்தது மட்டுமல்ல, ‘தாலாட்டுக் கேட்க’ என்ற பாடலையும் பாடியிருந்தார்.


2010ம் ஆண்டு தமிழ் சினிமாப் பாடல்களில் அதிக நேயர்கள் விரும்பிய பாடலைக் கொடுத்தவர் யுவன் சங்கர் ராஜா. இவர் இசை அமைத்த பாடலான ‘துளித்துளி’ என்ற பாடல் இடம் பெற்ற ஒலித்தட்டுகளே அதிக விற்பனை படைத்துச் சாதனை படைத்தன அது மட்டுமல்ல இந்திய அளவில் முதல் இருபது பாடல் வரிசையிலும் இந்தப் பாடல் இடம் பெற்றுக் கொண்டது. சென்ற வருடம் அதிக படங்களுக்கு இசை அமைத்த பெருமையும் (15) யுவன் சங்கர் ராஜாவையே சாரும். நான் மகான் அல்ல, பாஸ் என்கிற பாஸ்கரன் போன்ற படத்துப் பாடல்கள் பலராலும் பேசப்பட்ட பாடல்களாக இருந்தன. இவரது இசையமைப்பில் வெளிவந்த கோவா, சர்வம் போன்ற படங்கள் வெற்றிப்படமாக ஓடாவிட்டாலும் அதன் பாடல்கள் பற்றிப் பரவலாகப் பேசப்பட்டன.

இன்னுமொரு சிறந்த இசையமைப்பாளராக ஜீ.வீ. பிரகாஷ் அங்காடித் தெரு மூலம் பலராலும் பாராட்டப்பட்டிருக்கின்றார். ‘அவள் அப்படி என்றும் அழகில்லை’ என்ற பாடலும், தொடர்ந்து மதராசபட்டினம் படத்தில் வந்த ‘வாம்மா துரையம்மா’, ‘பூக்கள் பூக்கும்’ போன்ற பாடல்களும் அவருக்குப் புகழ் தேடித்தந்தன. அடுத்துப் பரவலாகப் பேசப்பட்டவர் இசையமைப்பாளர் இமாம். மைனா படத்தில் ‘மைனா மைனா நெஞ்சுக்குள்ளே’ என்ற பாடல் மூலம் பலரின் இதயத்தைத் தொட்டவர். இவர்களைவிட ஹரிஸ் ஜெயராயும் இசையுலகில் தனக்கென தனி இடம் பிடித்துள்ளார். சுமார் 175 பாடல்களுக்கு இதுவரை இசையமைத்திருக்கின்றார். அதிக பாடல் பாடியவர்களின் வரிசையில் எஸ்.பி. பாலசுப்பிரமணியம் சுமார் 1433 பாடல்களையும், பீ. சுசீலா சுமார் 1392 பாடல்களையும் பாடியிருக்கிறார்கள். அடுத்து ஜானகி சுமார் 1051 பாடல்களைப் பாடியிருக்கின்றார். ஈழத்துப் பாடகி சுமங்கலி இதுவரை சுமார் 9 தமிழ் பாடல்களும், பல தெலுங்குப் பாடல்களும் இதுவரை பாடியிருக்கின்றார். இசையமைப்பில் பெண்களின் பங்கு அதிகம் இல்லாவிட்டாலும் கனடாவில் உருவான படங்களுக்கு இசையமைப்பாளராக அமரர் பவதாரனி மதிவாசன் பணியாற்றினார் என்பது பெண்களுக்குப் பெருமைதரக் கூடியதே.

Sunday, January 15, 2012

PONGAL SONG FOR KIDS


பொங்கலோ பொங்கல்

தைபிறந்தால் வழிபிறக்கும்
பொங்கலோ பொங்கல்
தமிழர்களின் திருநாளாம்
பொங்கலோ பொங்கல்..     (RE - தைபிறந்தால்..)


கதிரறுத்துப் பொங்கிடுவோம்
பொங்கலோ பொங்கல்
கதிரவனை வணங்கிடுவோம்
பொங்கலோ பொங்கல்..     (RE - தைபிறந்தால்..)


உழைப்பாலே உயர்ந்திடுவோம்
பொங்கலோ பொங்கல்
ஒன்றுபட்டு வாழ்ந்திடுவோம்
பொங்கலோ பொங்கல்..     (RE - தைபிறந்தால்..)

-குரு அரவிந்தன்-





Pongalo Pongal Dance


Friday, January 6, 2012

ஓடுமீனோட.. காத்திருக்குமாம் கொக்கு

ஓடுமீனோட..  காத்திருக்குமாம் கொக்கு


அடக்கம் உடையாரை அறிவிலார் என்றெண்ணி கடக்கக் கருதவும் வேண்டா, மடைத் தலையில் ஓடுமீனோட உறுமீன் வருமளவும் வாடி நிற்குமாம் கொக்கு

கொக்கு மௌனமாக ஒற்றைக்காலிலே நிற்கிறதே என்பதற்காகக் கொக்கை ஏமாளி என்று எண்ணவேண்டாம். நேரகாலம் வரும்போதுதான் கொக்கு யாரைன்று தெரியவரும்.

Adakkam udaiyaarai arivilaar endrenni kadakka karuthavum venda, madaithalaiyil odum meen oda, oru meen varumalavum vaadi nirkumaam kokku.

This means, just because a person decides to be silent when faced with adversity does not mean that the person is stupid or is incapable of facing the adversity. It means that they are waiting for the right moment to spring into action. Just as how a crane, while looking for fish in the pond would let the small fish swim by and would strike when a sizeable fish comes about.

Wednesday, January 4, 2012

அகத்தின் அழகு

அகத்தின் அழகு

அகம் காட்டுவது முகம்தானே

அழுவதை நிறுத்துங்கள்

பயத்தை ஒழியுங்கள்

வலியை மறவுங்கள்

சிரியுங்கள்

நல்லதையே நினையுங்கள்

ஒளிமயமான எதிர்காலத்தை

நோக்கி நடவுங்கள்

இப்போ நிமிர்ந்து

பாருங்கள்

அகத்தின் அழகு

முகத்தில் தெரியும்.

-குரு அரவிந்தன்-


"Hands that serve are holier than the lips that pray"   

The world will not be destroyed by those who do evil;
but by those who watch them without doing anything. - Albert Einstein