Thursday, April 18, 2013

P.B. Srinivaas - பி.பி.சிறீனிவாஸ்

பிரபல பின்னணிப்பாடகர் பி.பி. சிறீனிவாஸின் மறைவு
குரு அரவிந்தன்
 
 
தமிழ்த்திரை உலகில் அன்றும் இன்றும் பலராலும் விரும்பப்பட்ட குரலுக்கு உரியவரான, ‘காலங்களில் அவள் வசந்தம்’ என்ற பாடலின் மூலம் பலரின் மனதைத் தொட்ட, பிரபல திரைப்படப் பின்னணிப் பாடகர் பி.பி.சிறீனிவாஸ் சென்னை சைதாப்பேட்டை சி.ஐ.டி.காலனியில் உள்ள அவரது இல்லத்தில் அவரது 82வது வயதில் (14-04-2013) காலமானார்.


1930ம் ஆண்டு செப்ரெம்பர் மாதம் 22ம் தேதி ஆந்திரமாநிலத்தில் உள்ள காக்கிநாடாவில் பிறந்த இவர் பனிந்திரஸ்வாமி, சேஷகிரியம்மா தம்பதிகளின் மகனாவார். திருமணமான இவருக்கு நான்கு மகன்களும், ஒரு மகளும் இருக்கின்றார்கள். பட்டதாரியான, கர்நாடக சங்கீதம் கற்ற இவர் தமிழ், தெலுங்கு, கன்னடம், மலையாளம், ஹிந்தி, உருது, சம்ஸ்கிருதம், ஆங்கிலம் போன்ற எட்டு மொழிகளை அறிந்திருந்தார். தமிழ், தெலுங்கு, கன்னடம், மலையாளம் உள்ளிட்ட 12 மொழிகளில், ஆயிரத்துக்கும் மேற்பட்ட பாடல்களை இதுவரை இவர் பாடியுள்ளார்.


ஆர்.நாகேந்திரராவின் ஜாதகபலம் என்ற படத்தில் தமிழ், தெலுங்கு, கன்னடம் ஆகிய மொழிகளில் திரைப்படப் பாடல்களைப் பாடியதன் மூலம் திரையுலகிறகு இவர் அறிமுகமானார். ஏ.எம்.ராஜா, ஜிக்கி ஆகியோரின் பாடல்கள் ஒரு காலத்தில் பலராலும் விரும்பிக் கேட்கப்பட்டது பலருக்கும் ஞாபகம் இருக்கலாம். அதேபோல பி.பி. சிறீனிவாஸ், ஜிக்கி இணைந்து பாடிய பாடல்களும் ஒருகாலத்தில் பிரபலமாக இருந்தன.
 
1952ம் ஆண்டு ஜெமினியின் மிஸ்டர் சம்பத் என்ற இந்திப் படத்தில் கீதாடட்டுடன் இணைந்து பாடியதில் இந்தித் திரையுலகில் அறிமுகமானார். 1955ம் ஆண்டு ஹரிச்சந்திரா என்ற மலையாள திரைப்படத்தில்  பாடல் பாடியதன் மூலம் மலையாள திரையுலகிறகு அறிமுகமானார். தமிழ் திரையுலக பிரபல நடிகர்  ஜெமினிகணேசனின் குரலுக்கு இணையாக இவரது குரல் இருந்ததால் நடிகர் காதல் மன்னன் ஜெமினிகணேசனுக்காக அதிக திரைப்படப் பாடல்களை இவர் பாடியுள்ளார். கன்னட திரைப்பட உலகில் முடிசூடா மன்னனாக விளங்கிய நடிகர் அமரர் ராஜ்குமாருக்கும் கன்னட மொழியில் அதிக பாடல்களை இவர் பாடியுள்ளார். லதா மங்கேஸ்கர்;, பி.பானுமதி, பி.சுசீலா, எஸ்.ஜானகி, கே.ஜமுனாராணி, எல்.ஆர்.ஈஸ்வரி, ஆகியோருடன் இவர் இணைந்து பல பாடல்களைப் பாடியுள்ளார். திரைப்படப் பாடல்கள் மட்டுமல்லாது, பக்திப் பாடல்கள், சுலோகங்கள், தோத்திரங்கள் என்று வேறுபல பாடல்களும் அதிகம் பாடியுள்ளார். இவரது கலைச் சேவைக்காக தமிழக அரசின் கலைமாமணி விருது மட்டுமல்ல, குரலிசைக்காகப் பல்வேறு விருதுகளும் பெற்றிருந்தார். கன்னட மொழியில் சுமார் 3000 பாடல்களைப் பாடிய இவருக்கு, கர்நாடக மாநிலத்தின் சிறந்த விருதான கன்னட ராஜ்ஜோதஸ்;சவ விருதும் கன்னட முதலமைச்சரிடம் இருந்து இவருக்குக் கிடைத்திருந்தது.


பி.பி. சிறினிவாஸ் பல தமிழ் பாடல்களைப் பாடியிருந்தாலும், சில பாடல்கள் மனதைவிட்டகலாமல் இன்றும் இருக்கின்றன. 1961ம் ஆண்டு பாசமலரும் அதைத் தொடர்ந்து பாவமன்னிப்பும் இவருக்குப் பகழ் தேடிக் கொடுத்தன. ஆண்டொன்றுபோனால், ஆறோடும் மண்ணில் எங்கும், அன்புமனம், அவள் பறந்து போனாளே, அழகிய மிதுலை, சின்னச்சின்ன, என்னருகே நீயிருந்தால், இன்பம் பொங்கும் வெண்ணிலா, இந்த மன்றத்தில் ஓடிவரும், இரவு முடிந்துவிடும், காதல் நிலவே, கண்ணும் கண்ணும் பேசியதும், மாம்பழத்து வண்டு, மனிதன் என்பவன், மயக்கமா கலக்கமா, மௌனமே பார்வையால், நீ போகுமிடமெல்லாம், நிலவே என்னிடம் நெருங்காதே, நெஞ்சம் மறப்பதில்லை,  நேற்றுவரை நீயாரோ, நிலவுக்கு என்மேல், நினைப்பதெல்லாம் நடந்துவிட்டால், பார்த்துப் பார்த்து, பொன்னென்பேன், பொன்னொன்று கண்டேன், பூஜைக்கு வந்த மலரே, ரோஜா மகளே இராஜகுமாரி, தென்றலே நீ பேசு, தோள் கண்டேன், உடலுக்கு உயிர் பாரம், உங்க பொன்னான கைகள் புண்ணாகலாமா? உன்னழகைக் கண்டுகொண்டால், யார் சிரித்தால், யார் யார் யார் இவர் யாரோ? போன்ற பி.பி. சிறினிவாஸின் சில பாடல்கள் இன்றும் எங்கள் மனதை விட்டகலாமல் இருக்கின்றன.


பி.பி.சிறினிவாஸின் மறைவுக்கு அஞ்சலி செலுத்தப் பிரபல திரையுலகப் பிரபலங்கள் பல வந்திருந்தனர். மறைந்த சிறினிவாஸின் உடல் அஞ்சலிக்காக அவரது வீட்டில் வைக்கப்பட்டிருந்தது. தமிழக முதலமைச்சர் செல்வி. ஜெயலலிதா, ராகவேந்திரா ராஜ்குமார், கவிஞர் வைரமுத்து, பாடகர் ஏ.எல்.ராகவன், எல்.ஆர்.ஈஸ்வரி, மாணிக்க விநாயகம், எஸ்.ஜானகி, சின்மயி உள்ளிட்ட பலர் தங்களது இரங்கலை தெரிவித்துள்ளனர்.


‘அவர் சிறந்த ஒரு ஆசிரியர் மட்டுமல்ல, தரமான பாடல்களைத் தரவேண்டும் என்ற கொள்கையும் கொண்டவர்’ என்று மறைந்த பாடகர் பி.பி. சிறினிவாஸைப்பற்றி அவரோடு பல பாடல்களை இணைந்து பாடிய பிரபலபாடகி எஸ். ஜானகி குறிப்பிட்டிருந்தார். இசை இரசிகர்களைவிட்டு அவர் மறைந்தாலும் காலமெல்லாம் அவர் குரல் ஒலித்துக் கொண்டேயிருக்கும்.
 

T.K.Ramamoorti - தி.கி. ராமமூர்த்தி

இசை மேதை தி.கி. ராமமூர்த்தியின் மறைவு.


குரு அரவிந்தன்


தமிழ் திரையுலகின் இசைத்துறைக்கு சென்றவாரம் பெரும் இழப்பு ஏற்பட்டிருக்கின்றது. ஒன்று திரையுலகில் தனது இனிய குரலால் பாடலிசைத்துக் கொடிகட்டிப் பறந்த பாடகர் பி.பி.சிறீனிவாஸின் இழப்பு, மற்றையது தமிழ் திரையுலகில் தனது இசையால் பல ஆண்டுகாலம் ஆளுமை செய்த இசையமைப்பாளர் ரி.கே. ராமமூர்த்தியினுடையது.
1922ம் ஆண்டு தமிழ்நாட்டில் உள்ள திருச்சிராப்பள்ளியில் பிறந்த ரி,கே. ராமமூர்த்தி 2013 ஏப்ரல் மாதம் 17ம்திகதி புதன்கிழமை நோய்வாய்ப்பட்டு தனது 91வது வயதில் சென்னை தமிழ்நாட்டில் காலமானார். அவரது புனித உடல் சென்னை ராயப்பேட்டை பாலாஜி நகரில் உள்ள அவரது வீட்டில் பொதுமக்கள் அஞ்சலிக்காக வைக்கப்பட்டிருந்தது. எம்மைவிட்டுப் பிரிந்த அமரர் ராமமூர்த்திக்கு 4 ஆண்கள் மற்றும் 7 பெண்கள் உட்பட 11 வாரிசுகள் உள்ளனர்.


ரி.கே. ராமமூர்த்தி என்று பலராலும் அழைக்கப்பட்ட இவர், தான் பிறந்த ஊரான திருச்சிராப்பள்ளியின் முதல் எழுத்தையும், தனது தந்தையின் முதலெழுத்தiயும் தனது பெயருக்கு முன்பாகப் பாவித்துக் கொண்டிருந்தார். சி.ஆர். சுப்புராமனின் இசைக்குழுவில் வயலின் வாசிப்பதில் மிகவும் திறமைசாலியாக இருந்த இவர் பின்னர் எம். எஸ் விஸ்வநாதனுடன் இணைந்து பல பாடல்களுக்கு இசை அமைத்திருக்கின்றார். இவரது தந்தையான கிருஸ்ணசுவாமி ஐயர், தாத்தாவான மலைக்கோட்டை கோவிந்தசுவாமி ஐயர் ஆகியோர் திருச்சிராப்பள்ளியில் வயலின் வாசிப்பதில் மிகவும் பிரபலமாக இருந்தார்கள்.  அவர்களிடம் இருந்து இவர் இந்த இனிய வயலின் இசையைக் கற்றுக் கொண்டார். அந்த நாட்களில் பிரபல இசை அமைப்பாளராக விளங்கிய எஸ். பி. வெங்கட்ராமன்தான் இவரைத் திரையுலகிற்கு அறிமுகப்படுத்தினார்.


தமிழ், தெலுங்கு, மலையாளம் போன்ற திரைப்படப் பாடல்களுக்கு இவர் இசையமைத்திருக்கின்றார். எம். எஸ். விஸ்வநாதனோடு இணைந்து 1952ல் ஆரம்பித்து, 60களில் சுமார் 700 தென்னிந்தியப் படங்களுக்குமேல் இவர் இசையமைத்திருக்கின்றார். பணம் படத்திற்காக 1952ல் இருவரும் இணைந்து இசையமைக்கத் தொடங்கி, அதன் வெற்றியைத் தொடர்ந்து பல படங்களுக்கு இருவரும் இணைந்து இசையமைத்தனர். ரி.கே.ராமமூர்த்தி வயலின் இசைப்பதில் திறமை மிக்கவராகவும், எம்.எஸ். விஸ்வநாதன் பியானோ, கீபோர்ட், ஹார்மோனியம் போன்ற இசைக்கருவிகளைக் கையாள்வதில் திறமை மிக்கவராகவும் இருந்தனர். 1965ம் ஆண்டு ஆயிரத்தில் ஒருவன் படத்திற்கு இசையமைத்ததைத் தொடர்ந்து சில தனிப்பட்ட காரணங்களுக்காக எம். எஸ். விஸ்வநாதனை விட்டுப் பிரிந்த இவர் தனிப்பட்ட முறையில் 1966 தொடக்கம் 1986வரை சுமார் 19 படங்கள்வரை இசையமைத்திருக்கின்றார். இருப்தியொன்பது வருடங்களின்பின் மீண்டும் 1995ம் ஆண்டு இருவரும் இணைந்து சத்தியராஜ் நடித்த எங்கிருந்தோ வந்தான் படத்திற்காக இசையமைத்திருக்கிறார்கள்.


இவர் தனியாக இசையமைத்த திரைப்படங்களில் சாது மிரண்டால், தேன் மழை, மறக்க முடியுமா, நான், தங்கச் சுரங்கம், காதல் ஜோதி, ஆலயம், சோப்பு சீப்பு கண்ணாடி, சங்கமம் போன்ற படங்கள் மிகப்பிரபலமானவை மட்டுமல்ல, திரைப்பட ரசிகர்களின் பாராட்டையும் பெற்றிருந்தன. ஆனால் எம். எஸ். விஸ்வநாதனுக்குக் கிடைத்ததுபோல அதிக படங்களின் வாய்ப்பு இவருக்குக் கிடைக்கவில்லை.


ஒரு காலத்தில் விஸ்வநாதன் - ராமமூர்த்தி என்றால் அவர்களின் இசையைக் கேட்பதற்கென்றே பல இசையார்வலர்கள் காத்திருந்தார்கள். இவர்கள் இருவரும் இணைந்து இசையமைத்தபோது ‘மெல்லிசை மன்னர்’ என்று தமிழ்த்திரையிசை ஆர்வலர்களால் பாராட்டப்பட்டனர். இலங்கை வானொலியில் அவர்கள் இசையமைத்த பாடல்கள் ஒலிபரப்பாத நாளேயில்லை எனலாம். அந்த அளவிற்கு அவர்கள் தமது இசை அமைப்பின் மூலம் தமிழ்த் திரையிசை இரசிகர்களைக் கவர்ந்திருந்தனர். சிவாஜிகணேசன், என்.டி. ராமராவ் ஆகியோர் நடித்த புகழ்பெற்ற படமான கர்னன் திரைப்படத்திற்கு மெல்லிசை மன்னர்கள் இருவரும் இணைந்தே  இசையமைத்திருந்தனர். மேலும், மறக்கமுடியமா படத்திற்காகக் கலைஞர் கருணாநிதியின் ‘காகித ஓடம் கடலலைமேலே’ என்ற பாடலுக்கு இசையமைத்ததன் மூலம் இவர் மிகவும் பிரபலமானார். எம்.ஜி.ஆர். நடித்த பணம் படைத்தவன் படத்தில் வரும் ‘கண் போனபோக்கிலே கால் போகலாமா’ என்ற பாடலில் வரும், பலரையும் கவர்ந்த வயலின் இசை இவருக்கே சொந்தமானது.



மெல்லிசை மன்னர்கள் இணைந்து இசையமைத்த பாடல்களில், எம்.ஜி. ஆரின் மன்னாதி மன்னன் படத்திற்காக மருதகாசியின் ஆடாத மனமும் உண்டோ, சிவாஜியின் பாசமலர் படத்திற்காக மலர்ந்தும் மலராத பாதி மலர்போல, பாக்கியலட்சுமி படத்திற்காக மாலைப்பொழுதின் மயக்கத்திலே, பார் மகளே பார் படத்திற்காக அவள் பறந்து போனாளே, பாகப்பிரிவினை படத்திற்காக தங்கத்திலே ஒரு குறையிருந்தாலும், ஆயிரத்தில் ஒருவன் படத்திற்காக அதோ அந்தப் பறவைபோல, நான் படத்திற்காக அம்மனோ சாமியோ போன்ற மறக்கமுடியாத பல பாடல்கள் இன்றும் நினைவைவிட்டு அகலாதிருக்கின்றன. தமிழ் திரைப்பட இசையுலகிற்கு அவராற்றிய பணி மகத்தானது. காலத்தால் அழிக்க முடியாத பல பாடல்களில் இவருடைய பங்கும் நிறைந்து இருக்கின்றது.

தமிழக அரசின் கலைமாமணி விருதைப் பெற்ற இவரைச் சமீபத்தில் ஜெயா தொலைக்காட்சியின் கௌரவிப்புவிழாவில் தமிழக முதலமைச்சர் செல்வி. ஜெயலலிதா இவரது இசைத்திறமையைப் பாராட்டி மேடையில் வைத்துக் கௌரவித்திருந்தார். அமரர் ராமமூர்த்தியின் மறைவுக்குத் தமிழக முதல்வர் ஜெயலலிதா, தி.மு.க. தலைவர் கலைஞர் கருணாநிதி ஆகியோர் இரங்கல் தெரிவித்துள்ளனர். எம் எஸ். விஸ்வநாதன், இளையராஜா, நடிகர் சிவகுமார், எஸ்.பி. முத்துராமன் உட்பட பல திரையுலகப் பிரமுகர்கள் வருகைதந்து அமரரான அவருக்கு இறுதி அஞ்சலி செலுத்தினர். பின்னர் ரி.கே. ராமமூர்த்தியின் பூதவுடல் ஊர்வலமாகக் கொண்டு செல்லப்பட்டு மயிலாப்பூர் கிருஷ்ணாம்போட்டை மயானத்தில் தகனம் செய்யப்பட்டது. மெல்லிசை மன்னரில் ஒருவரான ரி.கே. ராமமூர்த்தி இசையார்வலர்களை விட்டுப் பிரிந்தாலும் அவரது இசை காலமெல்லாம் ரசிகர்களின் இதயத்தில் ஒலித்துக் கொண்டேயிருக்கும்.