Friday, September 13, 2013

Principal P.Kanagasabapathy Library

அதிபர் பொ. கனகசபாபதிக்குக் கௌரவிப்பு
 

(குரு அரவிந்தன்)


 முன்னாள் மகாஜனக் கல்லூரி அதிபர் திரு பொ. கனகசபாபதி அவர்களைக் கௌரவிக்கும் முகமாக ரொறன்ரோவில் உள்ள யாழ் கூட்டுறவு சங்க கட்டிடத்தின் மூன்றாவது மாடியில் இயங்கும் நூல் நிலையத்திற்கு ‘அதிபர் கனகசபாபதி படிப்பகம்’ என்ற பெயர் சூட்டப்பட்டுள்ளது. இந்த நிகழ்வு சென்ற புதன்கிழமை (11-09-2013) யாழ் கூட்டுறவு மன்ற நூல் நிலையத்தில் அவர்களின் 25வது ஆண்டு நிறைவு வெள்ளிவிழாவை முன்னிட்டு நடைபெற்றது. முதலில் பெயர்ப் பலகையை அதிபர் திரை நீக்கம் செய்து வைத்தார். கூட்டுறவுச் சங்கத் தலைவர் ஸ்ரீகாந்தாவின் வரவேற்புரையைத் தொடந்து நண்பர்கள், ஆர்வலர்கள் சிலரின் உரை இடம் பெற்றது. நூலகத்தில் அதிபர் பொ. கனகசபாபதியின் புகைப்படம் ஒன்றும் அவரது சேவையைப்பாராட்டி வைக்கப்பட்டது. இந்த நிகழ்வில் அவரது மகனான மணிவண்ணன் கலந்து சிறப்பித்தார். கனடாவில் உள்ள நூல் நிலையம் ஒன்றிற்குத் ஈழத்தமிழர் ஒருவரின் பெயர் சூட்டப்பட்டிருப்பது எம்மினத்திற்குப் பெருமை சேர்ப்பதாக அமைந்திருக்கின்றது.



திரு. பொ. கனகசபாபதி அவர்கள் மகாஜனாக்கல்லூரியிலும், புத்தூர் சோமஸ்கந்தா கல்லூரியிலும் அதிபராகக் கடமையாற்றியிருந்தார். நைஜீரியாவில் கடமையாற்றி விட்டு அங்கிருந்து கனடா வந்த இவர் 1988ஆம் ஆண்டு யாழ். கூட்டுறவுச் சங்க வீட்டுத்திட்டத்தில் கட்டப்பட்ட தொடர்மாடி வீடு ஒன்றில் (Apartment)  )  ஆறாம் மாடியில் குடியேறியிருந்தார். பெரும்பாலும் தமிழர்களே குடியிருந்ததால் அங்கு ஒரு நூல் நிலையம் தேவை என்பதை உணர்ந்து அப்போது இருந்த நிர்வாக சபையின் ஆதரவுடன் இந்த நூல் நிலையத்தை மூன்றாம் மாடியில் ஆரம்பித்து வைத்தார். முக்கியமாக ஈழத்தமிழ் எழுத்தாளர்களின் ஆக்கங்களையும், சங்க இலக்கிய நூல்களையும் கொண்டதாக அப்போது இந்த நூல் நிலையம் அமைந்திருந்தது. இன்று பல்வேறுபட்ட நூல்களும் இந்த நூலகத்தில் இடம் பெற்றிருக்கின்றன. ஈழத்தில் இருந்து வெளிவரும் தினக்குரல், வீரகேசரி போன்ற வாராந்த பத்திரிகைகளும், சஞ்சிகைகளும் இந்த நூல்நிலையத்தில் இடம் பெற்றிருப்பதை என்னால் அவதானிக்க முடிந்தது. அடுத்த தலைமுறையினரின் தேவை கருதி முக்கியமாக சிறுவர் இலக்கிய நூல்களைச் சேகரிக்கும் திட்டம் ஒன்றைத் தற்போது நடை முறைப்படுத்த முற்பட்டிருக்கின்றனர்.




யாழ் கூட்டுறவு சங்க இயக்குனர்கள், அங்கத்தவர்கள், நண்பர்கள், ஆர்வலர்கள் பலரும் கலந்து கொண்டு இந்த நிகழ்வைச் சிறப்பித்தனர். இந்த விழாவிற்கான ஏற்பாடுகளை யாழ் கூட்டுறவு தொடர் மாடி வீட்டில் குடியிருக்கும் எழுத்தாளர் சந்திரபோஸ் அவர்கள் சிறப்பாகச் செய்திருந்தார். செயலாளர் மணி பத்மராஜாவின் நன்றியுரையைத் தொடர்ந்து, இரவு விருந்துபசாரத்துடன் இந்த நிகழ்வு சிறப்பாக முடிவுற்றது.

No comments:

Post a Comment