Thursday, April 23, 2015

பாரதி கலைக் கோயில்

பாரதி கலைக் கோயிலின் 
திறன்காணல் நிகழ்வு – 2015

(மணிமாலா)

பவதாரணியின் பாரதி கலைக் கோயிலின் திறன் காணல் நிகழ்வு – 2015 சென்ற விடுமுறை நாளான ஏப்ரல் மாதம் 3 ஆம் திகதி வெள்ளிக்கிழமை 2015 ஆம் ஆண்டு ரொறன்ரோவில் உள்ள பாரதி கலைக்கோயில் மண்டபத்தில் மிகவும் சிறப்பாக நடைபெற்றது. இரண்டு நாட்களாக இந்த திறன்காணல் நிகழ்வு இடம் பெற்றது. வெள்ளிக்கிழமை மாலை 6 மணியளவில் ஆரம்பமான பரிசளிப்பு விழாவில் எழுத்தாளர் திரு. குரு அரவிந்தன், திருமதி மாலினி அரவிந்தன் ஆகியோர் பிரதம விருந்தினராகக் கலந்து கொண்டு சிறப்பித்தனர்.


இசையில் ஆர்வமுள்ள பல கனடிய மணவ, மாணவிகள் மிகவும் ஆர்வத்தோடு கலந்து கொண்டு தங்கள் பல்வேறு வகைப்பட்ட திறமைகளை வெளிப்படுத்தும் ஒரு இனிய நிகழ்வாக, பவதாரணியின் பாரதி கலைக் கோயிலின் திறன் காணல் நிகழ்வு அமைந்திருந்தது. இசைத்தாய் அமரர் பவதாரணி மதிவாசனின் ஆசியால் வேகமாக வளர்ந்து வரும் பாரதி கலைக்கோயில் பவதாரணியின் கற்பித்தல் முறையைப் பின்பற்றி மாணவர்களுக்கு இலகுவாக இசை பயிற்றுவிக்கும் பாணியில் ஒரு பகுதியே இந்தத் ‘திறன் காணல்’ நிகழ்வாகும். பலராலும் பாராட்டப் பெற்ற இந்த திறன் காணல் நிகழ்வில் இசையில் ஆர்வமுள்ள பல மாணவர்கள் கலந்து  கொண்டு நிகழ்வைச் சிறப்பித்தனர். இளம் சிறார்களின் இந்த திறன் காணல் நிகழ்வின் மூலம் மண்டபத்தில் கூடியிருந்த மாணவச் செல்வங்களின் பெற்றோர்களும், இசைப்பிரியர்களான பார்வையாளர்களும் சிறந்த அனுபவத்தைப் பெற்றுக் கொண்டனர்.


அமரர் பவதாரணியின் பாரதி கலைக் கோயில் மாணவர்கள் கனடாவில் மட்டுமல்ல, இலங்கை, இந்தியா, ஐரோப்பிய நாடுகள், அமெரிக்கா என்று சமீபத்தில் உலகெல்லாம் அவர்கள் இசைப்பயணம் மேற்கொண்டு தமது திறமைகளை வெளிக்காட்டித் தமிழ் இசையை வளர்த்து வருவது பாரட்டப்பட வேண்டியது. 1996ம் ஆண்டு ஆரம்பிக்கப்பட்ட பாரதி கலைக்கோயில் இன்று வளர்ந்து இசைத் தாகத்தைத் தீர்க்கும் கற்பகதருவாய் நிற்கின்றது. பாரதி கலைக்கோயிலின் வளர்ச்சிக்கு திரு. எஸ். மதிவாசனும் அவரது மனைவியான அமரர் பவதாரணி மதிவாசனுமே முக்கிய காரணமாக இருந்தனர். ‘இசைத்தாய்’ பவதாரணியின் திடீர் மறைவு பெரியதொரு இழப்பாக இருந்தாலும் அந்த இழப்பை நிவர்த்தி செய்து பாரதி கலைக் கோயிலைத் தொடர்ந்தும் தலை நிமிர்ந்து நிற்க வைத்த பெருமை திரு. எஸ். மதிவாசனையும், அவரது உதவியாளர்களையுமே சேரும்.



தமிழ், வாய்ப்பாட்டு, வீணை, மிருதங்கம், வயலின், பரதநாட்டியம், தபேலா, ட்றம்ஸ், கிட்றார், கீபோர்ட் போன்ற நுண்கலைத் துறைகளில் மாணவர்கள் கற்ற நெறிகளில் இருந்து திறன் காணல் நிகழ்வு இடம் பெற்றது. இச்சந்தர்ப்பத்தில் கலைக்கோயில் அதிபர் மதிவாசன் சீனிவாசகம், ஆசிரியர்கள், யாழினி, இரத்னேஸ்வரன், மற்றும் தன்னார்வத் தொண்டர்கள், பிள்ளைகள் இசையைக் கற்பதற்கு ஆக்கமும் ஊக்கமும் தரும் பெற்றோர்கள் ஆகியோரும் நிச்சயமாகப் பாராட்டப்பட வேண்டியவர்கள்.



பிரதம விருந்தினராகக் கலந்து கொண்ட குரு அரவிந்தன் தனது உரையில், ‘பாரதி கலைக்கோயில் நிறுவனர் திரு.எஸ்.மதிவாசனின் வழிநடத்தலில் இத்தகைய திறன் காணல் நிகழ்வுகள் மூலம்; அமரர் இசைத்தாய் திருமதி பவதாரணி மதிவாசனின் கனவுகள் இக்கல்லூரி மாணவர்களின் பங்களிப்போடு ஒவ்வொன்றாக நிறைவேறுவதை நினைக்க எமக்குப் பெருமையாக இருக்கிறது. இதற்கு ஊக்கமும் ஆக்கமும் தந்த பெற்றோருக்கும் எமது மனமார்ந்த பாராட்டுக்கள் உரித்தாகுக. இக்; கல்லூரி தொடர்ந்தும் புலம் பெயர்ந்த மண்ணில் சிறப்பாகச் சேவையாற்றி, எனது மொழி, பண்பாடு, கலாச்சாரம், இசை, நுண்கலை, போன்றவற்றைப் பேணிக்காக்க வேண்டும் என்று மனதார வாழ்த்துகின்றேன்’ என்று தனது பிரதமவிருந்தினர் உரையில் குறிப்பிட்டார்.



இறுதியாக விருந்தினர் எல்லோரையும் மன மகிழவைத்த இந்த நிகழ்விற்கு ஊக்கம் தந்த பிரதம விருந்தினர் திரு. திருமதி குரு அரவிந்தன் அவர்களுக்கும், பெற்றோர்களுக்கும், தன்னார்வத் தொண்டர்களுக்கும், நிகழ்வில் கலந்து கொண்ட பார்வையாளர்களுக்கும், பங்கு பற்றிய மாணவர்களுக்கும் பாரதி கலைக் கோயிலின் சார்பில் அதிபர் திரு. எஸ். மதிவாசன் அவர்கள் நன்றி தெரிவித்தார்.

No comments:

Post a Comment