Monday, July 27, 2015

PAN AMERICAN GAME - பான் அமெரிக்கன் விளையாட்டுப் போட்டி

பான் அமெரிக்கன் விளையாட்டுப் போட்டி

குரு அரவிந்தன்

நான்கு வருடங்களுக்கு ஒரு முறை அமெரிக்கா கண்டத்தில் நடைபெறும் இந்த விளையாட்டுப் போட்டி மிகவும் பிரபலமானது. இந்த விளையாட்டுப் போட்டியை பான் ஆம் விளையாட்டுப் போட்டி என்றோ அல்லது பான் அமெரிக்கன் விளையாட்டுப் போட்டி (Pயn யுஅநசiஉயn புயஅநள) என்றோ சுருக்கமாகச் சொல்வர். வட அமெரிக்கா, மத்திய அமெரிக்கா, தென் அமெரிக்காவும் இவற்றைச் சூழவுள்ள தீவுகளும் இதில் அடங்கும். கோடைகால ஒலிம்பிக் விளையாட்டுப் போட்டிக்கு முன்பாக விளையாட்டு வீரர்கள் தங்கள் திறமையைக் காட்டுவதற்காக இந்த விளையாட்டுப் போட்டியைப் பயன் படுத்துவதுண்டு. 1932 ஆம் ஆண்டு கோடைகால ஒலிம்பிக் போட்டி லொஸ் ஏஞ்சலில் நடைபெற்ற போது சிறந்த விளையாட்டு வீரர்களை தெரிவு செய்வதற்கு ஒலிம்பிக் விளையாட்டுப் போட்டிக்கு முன்பாக ஒரு விளையாட்டுப் போட்டி நடத்துவது என்று தீர்மானிக்கப்பட்டது. அதன்படி டலாஸ் என்ற நகரத்தில் முதல் விளையாட்டுப் போட்டி 1937 இல் நடைபெற்றாலும் அதுபற்றி அதிகம் பேசப்படவில்லை. 1942 ஆம் ஆண்டு புவனஸ்ஐரஸில் விளையாட்டுப் போட்டி வைப்பதாகத் தீர்மானித்தாலும் இரண்டாம் உலக யுத்தம் காரணமாகப் பின் தள்ளி வைக்கப்பட்டது.


1951 ஆம் ஆண்டு பதிவு செய்யப்பட்ட முதலாவது பான் ஆம் விளையாட்டுப் போட்டி ஆஜென்ரியாவில் திட்டமிட்டபடியே நடைபெற்றது. தொடர்ந்து 1955 இல் மெக்ஸிக்கோ  1959 இல் சிக்காக்கோவிலும், 1963 இல் பிரேஸிலிலும், 1967 கனடா வின்னிபெக்கிலும் நடைபெற்றன. 1951 ஆம் ஆண்டு விளையாட்டுப் போட்டி ஆரம்பமானபோது 2513 வீரர்கள் 21 நாடுகளில் இருந்து பங்கு பற்றியிருந்தனர். 2007 ஆம் ஆண்டு நடைபெற்ற போட்டியில் 5633 வீரர்கள் 42 நாடுகளில் இருந்து பங்கு பற்றியிருந்தனர். ஸ்பானிஸ் மொழியும், ஆங்கில மொழியும் இவ் விளையாட்டுப் போட்டிகளின்போது பாவனை மொழியாக இருக்கின்றன. இப்பொழுது நாங்கள் புகுந்த மண்ணான கனடாவின் ரொறன்ரோவில் நடைபெறுவது 17 வது பான் அமெரிக்கன் விளையாட்டுப் போட்டியாகும்.


2015 ஆம் ஆண்டு யூலை மாதம் 10 ஆம் திகதி இந்த விளையாட்டுப்போட்டி கனடாவின் ரொறன்ரோ நகரத்தில் நடைபெற இருக்கின்றது. 10 ஆம் திகதி ஆரம்பமாகி யூலை மாதம் 26 ஆம் திகதி போட்டிகள் முடிவடையும். 41 நாடுகளில் இருந்து சுமார் 6135 விளையாட்டு வீரர்கள் இந்தப் போட்டியில் பங்குபற்றுகின்றனர். 36 விளையாட்டுக்களுக்கான 364 போட்டிகள் இம்முறை இங்கே நடைபெற இருக்கின்றன. ரொறன்ரோ டவுன்ரவுனில் உள்ள ஸ்கைடோம் என்று முன்பு அழைக்கப்பட்ட றோஜஸ் சென்ரறில் அனேகமான போட்டிகள் நடைபெற இருக்கின்றன. 1989 ஆம் ஆண்டு 570 மில்லியன் டொலர் செலவில் நிர்மாணிக்கப்பட்ட இந்த விளையாட்டரங்கு ஒன்ராறியோ வாவியின் வடகரையில் சீஎன் கோபுரத்திற்கு அருகாமையில் அமைந்திருக்கின்றது. சுமார் 50,000 பார்வையாளர்கள் அமரக்கூடிய வசதிகளைக் கொண்டது. அதே சமயம் இந்த விளையாட்டரங்கின் மேலே உள்ள கூரை திறந்து மூடக்கூடிய வசதியையும் கொண்டுள்ளது. யூனியன் பியர்சன் விரைவு தொடர்வண்டிச் சேவையும் இந்த விளையாட்டுப் போட்டியை முன்னிட்டு முற்கூட்டியே ஆரம்பித்து வைக்கப்பட்டது. வெளிநாட்டுப் பார்வையாளர்கள் பியர்சன் விமான நிலையத்தில் இருந்து இலகுவாகச் செல்வதற்கு இந்த தொடர் வண்டிச் சேவை வசதியாக இருக்கும் என் எதிர்பார்க்கப் படுகின்றது.



சில விளையாட்டுப் போட்டிகள் ரொறன்ரோவைச் சுற்றியுள்ள நகரங்களில் அவ்வப்போது இடம் பெற இருக்கின்றன. குறிப்பாக பிரபல விளையாட்டுப் போட்டியான உதைபந்தாட்டம் இம்முறை ஹமில்டனில் உள்ள சிஐபிசி விளையாட்டரங்கில் நடைபெற இருக்கின்றது. நெரிசலைத் தவிர்க்கும் முகமாக கனன் வீதியில் உள்ள வாசல் வழியாக உதைபந்தாட்ட ரசிகர்களை உள்ளே வரும்படி கேட்டிருக்கிறார்கள். பான் அமெரிக்க விளையாட்டுப் போட்டிகளில் ஒன்றான உதைபந்தாட்டத்தின் 2011 ஆம் ஆண்டுக்கான உதைபந்தாட்டக் கிண்ணத்தை மெக்ஸி;க்கோ பெற்றுக் கொண்டது. இதுவரை உதைபந்தாட்டக் கிண்ணத்தை ஆஜன்ரியா ஆறு தடவைகளும், மெக்ஸிகோவும் பிரேஸிலும் தலா நான்கு தடவைகளும் பெற்றுக் கொண்டன. இம்முறை யாருக்கு கிடைக்கப் போகிறது என்று காத்திருந்து பார்ப்போம்.



இந்த பான் அமெரிக்கன் விளையாட்டுப் போட்டி கனடாவில் நடக்கும் மூன்றாவது விளையாட்டுப் போட்டியாகும். முதலாவது 1967 ஆம் ஆண்டு ரொறன்ரோவிலும், இரண்டாவது 1999 ஆம் ஆண்டு வின்னிப்பெக்கிலும் நடைபெற்றன. இம்முறை பான் அமெரிக்கன் சுடர் மேமாதம் 30 ஆம் திகதி ரொறன்ரோவில் எடுத்துச் செல்லப்பட்டு யூலை 10 ஆம் திகதி போட்டி ஆரம்பமாகும் இடத்திற்குக் கொண்டு செல்லப்படும். முதலாவது நிகழ்ச்சியான வாட்டபோலோ (றுயவநச Pழடழ) மூன்று நாட்களுக்கு முன்பாக யூலை மாதம் 7 ஆம் திகதியே ஆரம்பமாக உள்ளது. இதில் பங்குபற்றுபவர்களில் 45 வீதமானவர்கள் பெண்களாகும். இந்த பான் அமெரிக்கன் விளையாட்டுப் போட்டிக்காக பெரு நாடும், கொலம்பியா நாடும் கனடாவுடன் போட்டி போட்டிருந்தாலும் கனடா 33 வாக்குகளைப் பெற்றுத் தெரிவானது. அதிக விளையாட்டு வீரர்கள் பங்குபற்றும் நாடுகளில் இம்முறை பிறேசில்(582) கனடா(574) ஐக்கிய அமெரிக்கா(441) மெக்ஸிகோ (419) ஆஜன்ரியா (397) ஆகியன அடங்கும். ஆகக் குறைந்த தொகையினர் சென். வின்சன்ட் தீவில் இருந்து பங்குபற்றுகின்றனர்.  நெதர்லண்ட் அன்ரிலிஸ் (நேவாநசடயனௌ யுவெடைடநள)  என்ற சிறிய தீவில் உள்ள நாடு போட்டியில் இம்முறை பங்குபற்றவில்லை.



பராலிம்பிக் விளையாட்டுப் போட்டிபோல பராபன் விளையாட்டுப் போட்டியும் 1999 இல் இருந்து பான் அமெரிக்கன் விளையாட்டுப் போட்டியைத் தொடர்ந்து நடைபெறுகின்றது. இம்முறை ரொறன்ரோவில் ஆகஸ்ட் மாதம் 7 ஆம் திகதி ஆரம்பித்து ஆகஸ்ட் மாதம் 15 ஆம் திகதி இந்த விளையாட்டுப் போட்டி முடிவடையும்.


2011 ஆம் ஆண்டுக்கான 16 வது விளையாட்டுப் போட்டி ஒக்டோபர் மாதம் மெக்ஸிக்கோவில் நடைபெற்றது. 42 நாடுகளில் இருந்து 36 விளையாட்டுப் போட்டிகளுக்கு 6000 வீரர்கள் பங்கு பற்றியிருந்தனர். மூன்றாவது தடவையாக இந்தப் போட்டி மெக்ஸிக்கோவில் நடைபெற்றது. ஐக்கிய அமெரிக்கா 98 தங்கப் பதக்கங்களையும், கனடா 30 தங்கப் பதக்கங்களையும் பெற்றிருந்தன. அடுத்த 18 வது விளையாட்டுப் போட்டி பெரு நாட்டில் நடைபெற இருக்கின்றது. ஆஜன்ரினா, சிலி, வெனிசூலா ஆகிய நாடுகள் இதற்காகப் போட்டி போட்டாலும் பெருநாடு 31 வாக்குகளைப் பெற்று முதலிடத்திற்குத் தெரிவானது. பசுபிக் கடலோரத்தில் அமைந்திருக்கும் பெரு நாட்டின் தலைநகரான லீமா நகரத்தில் 2019 ஆம் ஆண்டு யூலை 26 ஆம் திகதி அடுத்த விளையாட்டுப் போட்டி தொடங்கி ஆகஸ்ட் மாதம் 11 ஆம் திகதி விளையாட்டுப் போட்டிகள் முடிவடையும்.

No comments:

Post a Comment