Thursday, July 23, 2015

திருவள்ளுவர் - Thiruvalluvar

திருவள்ளுவர் சிலை  

(குரு அரவிந்தன்)

கோபுரங்கள் தான் உயர்ந்து நிற்குமென்பதில்லை, சாதனைகளை எடுத்துச் சொல்லும் நினைவுச் சிலைகளும் கூட உயர்ந்து நிற்பதை பல இடங்களில் நாம் கண்டிருக்கின்றோம். தமிழனின் புகழை உலகெல்லாம் பரப்பி நிற்பவர்களில் திருக்குறளை ஆக்கித் தமிழ் உலகிற்குத் தந்த திருவள்ளுவர் காலமெல்லாம் போற்றப்பட வேண்டியவர். இவரைப் பொய்யாமொழிப் புலவர் என்றும் அழைப்பர். திருக்குறளின் புகழ் உலகெங்குப் பரவி நின்றாலும் அதை ஆக்கித் தந்தவரை நினைவு கூரவேண்டும் என்ற பெருவிருப்பின் காரணமாக அமைந்ததுதான் தமிழ் நாட்டின் தென்கரையில், கன்னியாகுமரியில் உள்ள வானம் தொட்டு நிற்கும் திருவள்ளுவர் சிலை.

கன்னியாகுமரி முனையில், விவேகானந்தர் நினைவுப் பாறைக்கு அருகே உள்ள பாறையில் அமைந்திருக்கும் இந்தத் திருவள்ளுவர் சிலை 133 அடி உயரத்தைக் கொண்டது. வங்காளவிரிகுடா, அரபிக்கடல், இந்து சமுத்திரம் ஆகிய மூன்று கடல்களும் சந்திக்கும் முக்கிய இடத்தில் இந்தச் சிலை நிமிர்ந்து நிற்கின்றது. 1979 ஆம் ஆண்டு இந்தியப் பிரதமராக இருந்த மொராஜிதேசாய் அவர்களால் இதற்கான அத்திவாரக் கல் நாட்டப்பட்டது. ஆனாலும் 1990 ஆம் ஆண்டுதான் இதற்கான முக்கிய வேலைகள் ஆரம்பிக்கப்பட்டன. கன்னியாகுமரியில் உள்ள கலங்கரை விளக்கத்திற்கு இதனால் இடையூறு ஏற்படும் என்று கூறி, திருவள்ளுவர் சிலையை இந்த இடத்தில் அமைக்க 1994 ஆம் ஆண்டு மத்திய அரசு தடை விதித்திருந்தாலும், 1996 ஆம் ஆண்டு தமிழ் பெரியோரின் விடா முயற்ச்சியால் தடை நீக்கப்பட்டது. 2000 ஆம் ஆண்டு இந்தப் பணி முடிவடைந்தது. திருவள்ளுவரின் இந்தச் சிலை 7000 தொன் எடை கொண்டது. இதற்கான கற்கள் முக்கியமாக கன்னியாகுமரி, அம்பாசமுத்திரம், சங்கரபுரம் ஆகிய மூன்று இடங்களில் இருந்தும் பெறப்பட்டு வேலைகள் இடம் பெற்றன. திருவள்ளுவருக்கான சிலையும் மேடையும் அமைப்பதற்காகப் பாவிக்கப்பட்ட கற்களில் 3681 கற்கள் பதினைந்து தொன்களுக்கு மேற்பட்ட நிறையைக் கொண்டிருந்தன. ஏனைய கற்களில் அனேகமானவை சராசரி மூன்று தொடக்கம் பத்து தொன்கள்வரை நிறை உடையனவாக இருந்தன. இதைவிட 19 அடி உயரமான முகம், குறிப்பாக காதுகள், மூக்கு, கண்கள், வாய், நெற்றி போன்றவை தனித்தனிக் கற்களில் கையால் பொழிந்து பொருத்தப்பட்டன. நுட்பமான கற்களைச் செதுக்குவதற்கு மிகவும் அனுபவம் மிக்க சிற்பிகள் ஈடுபடுத்தப் பட்டனர். சுமார் ஒரு மில்லியன் அமெரிக்க டொலர் வரை இந்தச் சிலை செய்வதற்காகச் செலவிடப்பட்டது. அனுபவம் மிக்க சிற்பிகள், மேற்பார்வையாளர்கள் உட்பட சுமார் 150 தொழிலாளர்கள் இந்தச் சிலையை நிர்மாணிப்பதற்கு மிகவும் உதவியாக இருந்தனர்.

திருவள்ளுவர் நினைவுச் சின்னத்தின் மொத்த உயரம் 133 அடியாக இருந்தாலும் சிலையின் உயரம் 95 அடியாகவும், சிலை வைக்கப்பட்டுள்ள பீடம் 38 அடி உயரமாகவும் இருக்கின்றது.  திருவள்ளுவர் தந்த திருக்குறளில் 133 அத்தியாயங்கள் இருப்பதால் அதை அடையாளப் படுத்துவதற்காக 133 அடி உயரச் சிலை வடிவமைக்கப்பட்டது. இதில் 133 குறட்பாக்களும் பொறிக்கப்பட்டிருக்கின்றன. சென்னையில் உள்ள வள்ளுவர் கோட்டத்தை உருவாக்கிய பிரபல சிற்பி கணபதி ஸ்தபதி இதற்குப் பொறுப்பாக இருந்தார். மிலேனியம் ஆண்டாகிய 2000 ஆண்டு ஜனவரி மாதம் 1ஆம் திகதி பொதுமக்கள் பார்வைக்காக இந்தச் சிலை திறந்து வைக்கப்பட்டது.
தமிழ் மொழி பேசுவோர் இன்று உலகெல்லாம் பரவி இருப்பதால், பல நாடுகளில் இருந்தும் வருகின்ற சுற்றுலாப் பயணிகள் ஆர்வத்தோடு வந்து பார்க்கும் முக்கிய நினைவுச் சின்னமாகத் திருவள்ளுவரின் சிலை அமைந்திருக்கின்றது. இந்த திருவள்ளுவரின் நினைவுச் சின்னம் 2004 ஆம் ஆண்டு டிசெம்பர் மாதம் 26 ஆம் திகதி ஏற்பட்ட ஆழிப்பேரலையால் சிறிதளவு பாதிக்கப்பட்டாலும், பின்னாளில் திருத்தி அமைக்கப்பட்டது. திருவள்ளுவர் சிலை எழுப்பிய 15வது வருட நினைவு தினம் திருவள்ளுவர் சிலை பாறை வளாகத்தில் கன்னியாகுமரி வரலாற்று பண்பாட்டு ஆய்வு மையத்தினால் 2015 ஆம் ஆண்டு ஐனவரிமாதம்; கொண்டாடப்பட்டது.  இந்த ஆண்டு திருவள்ளுவர் தினத்தை தேசிய அளவில் கொண்டாடவும், கன்னியாகுமரியில் இருந்து சென்னைக்கு திருக்குறள் திருப்பயணம் செய்யவும் முடிவு செய்யப்பட்டுள்ளது. எம்மினத்தின் அடுத்த தலைமுறையினர் அவசியம் பார்க்க வேண்டிய நினைவுச்சின்னங்களில், உலகெல்லாம் தமிழரின் புகழ் பரப்பி நிற்கும் இந்த திருவள்ளுவர் சிலையும் ஒன்றாகும்.

(நன்றி: தமிழர் தகவல்)

No comments:

Post a Comment